ایوان بالا اجلاس : سی ایس ایس کے لئے عمر اور مواقع میں اضافہ سے متعلق قومی اسمبلی سے منظور شدہ قرارداد پر عملدرآمد کی رپورٹ طلب

منگل 19 اگست 2025 20:52

اسلام آباد (اُردو پوائنٹ اخبارتازہ ترین - آن لائن۔ 19 اگست2025ء) ڈپٹی چیئرمین سینیٹ سیدال خان ناصر نے سی ایس ایس کے لئے عمر اور مواقع میں اضافہ سے متعلق قومی اسمبلی سے منظور شدہ قرارداد پر عملدرآمد کی رپورٹ طلب کرلی۔منگل کو سینیٹر فوزیہ ارشد نے عوامی اہمیت پر بات کرتے ہوئے کہا کہ سی ایس ایس کے امتحان کے لئے عمر 35 سال اور اس کے لئے چانس 5 کرنے کی قرارداد قومی اسمبلی سے منظور ہوئی تھی انہوں نے کہا کہ اس کے لئے آن لائن داخلے جاری ہیں اور 25 اگست آخری تاریخ ہے اس قرارداد کے حوالے سے کیبنیٹ ڈویڑن کا نوٹیفکیشن درکار ہے انہوں نے کہا کہ سی ایس ایس کا سکریننگ پراسیس نومبر تک ہوگااس کی تاریخ میں توسیع کی جائے۔

انہوں نے کہا کہ خیبرپختونخوا میں حالیہ سیلاب کی تباہ کاریوں سے سب کا دل دکھی ہیکلاؤڈ برسٹ کے لئے خبردار کیا جاتا رہا تاہم ہم نے موسمیاتی تبدیلیوں سے نمٹنے کے لئے کوئی اقدامات نہیں اٹھائے انہوں نے کہا کہ ہمارے پاس جنگلات نہیں ہیں ٹمبر مافیا نے درخت کاٹ کر پہاڑ خالی کر دیئے ہیں اس پر توجہ دینے کی ضرورت ہے اورجنگلات کو فعال کرنا ہے،یہ قدرتی آفت قدرت کی طرف سے نہیں یہ انسانوں کی وجہ سے ہے،دریاؤں اور آبی گذرگاہوں کو روک کر تعمیرات اور ہاؤسنگ سوسائٹیاں بنائی گئی ہیں،یہاں سے آبادی کو بچانے کے لئے بند باندھے جائیں،ہمیں جنگلات لگانے اور محکمہ جنگلات کو متحرک کرنا ہے،ٹمبر مافیا کو روکنا ہوگا،یہ تجاویز متعلقہ کمیٹی کو ارسال کی جائیں۔

(جاری ہے)

ڈپٹی چیئرمین سینٹ سیدال خان ناصر نے کہا کہ سی ایس ایس کی عمر اور چانس کا معاملہ وزارت تعلیم سے متعلق ہے۔وزیر تعلیم خالد مقبول صدیقی نہیں ہیں۔انہوں نے کہا کہ اس حوالے سے رپورٹ طلب کریں،یہ بچوں کے مستقبل کا معاملہ ہے،موسمیات کے حوالے سے بھی تجاویز اہم ہیں۔۔