اداکارعمران اشرف کی فلم ’’اینا نوں رہنا سہنا نئیں آندا‘‘ کا ٹریلرریلیز

فلم 22 اگست کو پاکستان سمیت دنیا بھر میں سینما گھروں کی زینت بنے گی

بدھ 20 اگست 2025 14:41

اداکارعمران اشرف کی فلم ’’اینا نوں رہنا سہنا نئیں آندا‘‘ کا ٹریلرریلیز

لاہور(اُردو پوائنٹ اخبارتازہ ترین - این این آئی۔ 20 اگست2025ء)مقبول اداکار و ٹی وی میزبان عمران اشرف کی آنے والی کینیڈین بھارتی پنجابی فلم’’ اینا نوں رہنا سہنا نئیں آندا کا ٹریلر ریلز ہوگیا، فلم 22 اگست کو پاکستان سمیت دنیا بھر میں سینما گھروں کی زینت بنے گی۔ عمران اشرف مذکورہ کینیڈین بھارتی پنجابی فلم سے قبل متعدد پاکستانی فلموں میں کام کر چکے ہیں، تاہم وہ پہلی بار کسی غیر ملکی فلم میں نظر آئیں گی، فلم کی زیادہ تر کاسٹ کینیڈین نژاد بھارتی اداکاروں پر مشتمل ہے، تاہم اس میں دیگر پاکستانی پنجابی اداکار بھی نظر آئیں گے۔

اینا نوں رہنا سہنا نئیں آندا میں عمران اشرف مرکزی کردار میں نظر آئیں گے، فلم کی ہدایات روپن بال دیں گے جب کہ اس میں بھارتی پنجابی گلوکار و اداکار جیسی گل بھی ایکشن میں نظر آئیں گے، فلم کی دیگر کاسٹ میں رنجیت باوا، مینڈے ٹکھڑ، سپنا پبی، نمال رشی، ناصر چنیوٹی اور نوپریت بانگا سمیت دیگر اداکار شامل ہیں۔

(جاری ہے)

فلم کے ٹریلر سے کہانی سمجھنا مشکل ہے، تاہم عندیہ ملتا ہے کہ فلم کی کہانی نوجوان طلبہ کے گرد گھومتی ہے، رومانٹک کامیڈی فلم کے ٹریلر کو کافی پذیرائی مل رہی ہے اور فلم کی ٹیم نے اسے 22 اگست کو ریلیز کرنے کا اعلان کردیا۔

فلم کی زیادہ تر ٹیم کینیڈین نژاد بھارتیوں پر مشتمل ہے، اسی لیے فوری طور پر بھارتی ہندووں نے اس میں پاکستانی اداکاروں کے کام پر اعتراض نہیں کیا، ممکنہ طور پر مذکورہ فلم کو بھی بھارت کے بغیر دیگر ممالک میں ریلیز کیا جائے گا۔