وفاقی وزیر برائے پٹرولیم علی پرویز ملک سے امریکی ناظم الامورنیٹلی بیکر کی ملاقات، تیل، گیس، معدنیات کے شعبوں میں دوطرفہ تعاون کو مضبوط بنانے پر تبادلہ خیال

اسلام آباد (اُردو پوائنٹ اخبارتازہ ترین - اے پی پی۔ 20 اگست2025ء) وفاقی وزیر برائے پٹرولیم علی پرویز ملک سے پاکستان میں تعینات امریکی ناظم الامور نیٹلی بیکر نے ملاقات کی ، ملاقات میں امریکا اور پاکستان کے درمیان توانائی خصوصاً تیل، گیس اور معدنیات کے شعبوں میں دوطرفہ تعاون کو مضبوط بنانے پر تبادلہ خیال کیا گیا ۔ بدھ کو وزارت پٹرولیم کی جانب سے جاری بیان کے مطابق وزارتِ پٹرولیم میں ہونے والی اس ملاقات کے دوران امریکی ناظم الامور نیٹلی بیکر نے پاکستان کی توانائی کی صنعت میں امریکی سرمایہ کاری کے وسیع مواقع کو اُجاگر کیا۔

انہوں نے کہا کہامریکی صدر ڈونلڈ ٹرمپ کے وژن کے تحت امریکی کمپنیاں پاکستان کے تیل، گیس اور معدنیات کے شعبے میں گہری دلچسپی رکھتی ہیں۔

(جاری ہے)

امریکا پاکستان کے ساتھ مل کر کام کرنے کے لیے پُرعزم ہے۔ امریکی سفارتخانہ، ایکسپلوریشن اینڈ پروڈکشن سیکٹر میں امریکی اور پاکستانی کمپنیوں کے درمیان براہ راست روابط قائم کرنے میں فعال کردار ادا کرے گا تاکہ اس شعبے کی مکمل صلاحیت کو بروئے کار لایا جا سکے۔

وفاقی وزیر علی پرویز ملک نے امریکی سرمایہ کاروں کی گہری دلچسپی کا خیرمقدم کیا ۔ انہوں نے کہا کہ پاکستان کی حکومت آف شور اور آن شور آئل و گیس کے ایکسپلوریشن بلاکس کے لیے نیلامی کا عمل شروع کر رہی ہے جو بین الاقوامی شراکت داروں کے لیے ایک شاندار موقع ہے۔ پاکستان میں خاص طور پر شیل آئل اور گیس کے حوالے سے بہت زیادہ غیر استعمال شدہ وسائل موجود ہیں اور ان مقامی وسائل کو قابلِ استعمال ذخائر میں تبدیل کرنا ہماری حکومت کا ہدف ہے۔

ہم پہلے ہی امریکی کمپنیوں کے ساتھ مثبت معلوماتی تبادلے کر رہے ہیں۔ دونوں حکام نے حالیہ ’’ڈائریکٹ لائن‘‘ ویبینار کی کامیابی کو سراہا جو امریکی کمپنیوں کو پاکستان کے معدنیات کے شعبے میں مواقع سے جوڑنے کے لیے منعقد کیا گیا تھا اور اسے آئندہ تیل و گیس کے شعبے میں تعاون کے لیے ایک ماڈل قرار دیا۔امریکی ناظم الامور نے اس بات پر زور دیا کہ امریکا ، پاکستان انسدادِ دہشتگردی مکالمہ کامیابی سے جاری رہا ہے، اب ہم چاہتے ہیں کہ اس شراکت داری کو اقتصادی میدان میں بھی آگے بڑھایا جائے۔

ملاقات میں اس عزم کا اعادہ کیا گیا کہ توانائی کے شعبے میں شراکت داری کو مزید مضبوط بنایا جائے گا اور امریکی ٹیکنالوجی و سرمایہ کاری کے ذریعے باہمی اقتصادی و توانائی ترقی کو فروغ دیا جائے گا۔\932