وزیر اعلی پنجاب کا ویژن، عوامی فلاح منصوبوں کی منظوری،لاہور کی تاریخ میں پہلی بار ویسٹ واٹر ٹریٹمنٹ پلانٹس کی تنصیب کی جائے گی

بدھ 20 اگست 2025 23:20

لاہور (اُردو پوائنٹ اخبارتازہ ترین - اے پی پی۔ 20 اگست2025ء) وزیر اعلی پنجاب مریم نواز کے ویژن کے تحت عوامی فلاح و بہبود کے منصوبوں کی منظوری ترجیحی بنیادوں پر دی جا رہی ہے، دہائیوں سے التوا کا شکار اہم منصوبے بھی اب منظور ہونے لگے ہیں۔ ترجمان محکمہ ہائو سنگ کے مطابق لاہور کی تاریخ میں پہلی بار ویسٹ واٹر ٹریٹمنٹ پلانٹس کی تنصیب کی جا رہی ہے، بابو صابو ویسٹ واٹر ٹریٹمنٹ پلانٹ پی ڈی ڈبلیو پی سے منظور ہو چکا ہے جبکہ کٹاربند ویسٹ واٹر ٹریٹمنٹ پلانٹ کی منظوری بھی لی جائے گی۔

ترجمان کے مطابق منصوبوں کے تحت سیوریج کے پانی کو صاف کر کے دریائے راوی میں ڈالا جائے گا، اس مقصد کے تحت بابو صابو کے مقام پر 836 ایکڑ اراضی سال 1992-93 میں حاصل کی گئی تھی، بابو صابو ویسٹ واٹر ٹریٹمنٹ منصوبے کی کل لاگت 50.2 ارب روپے ہے، پہلے مرحلے میں کینٹ ڈرین، ملتان روڈ اور گلشن راوی کے سیوریج کو صاف کرنے کی سہولت فراہم کی جائے گی، یہ منصوبہ فرانس کے ڈونر ادارے اے ایف ڈی کے تعاون سے مکمل کیا جائے گا، منصوبے کے تحت یومیہ 88 ملین گیلن پانی صاف کیا جا سکے گا جبکہ منصوبے کی کل استعداد یومیہ 198 ملین گیلن ہو گی، یہ منصوبہ تقریبا ساڑھے چار سال میں مکمل کیا جائے گا۔

(جاری ہے)

ترجمان کے مطابق لاہور کا سیوریج ڈسپوزل سے پہلے مکمل طور پر صاف کرنے کے لیے کل 6 ویسٹ واٹر ٹریٹمنٹ پلانٹس درکار ہوں گے، سینئر منسٹر پنجاب مریم اورنگزیب کی ہدایات کی روشنی میں ماحولیاتی بہتری کے منصوبے ترجیحی بنیادوں پر مکمل کیے جائیں گے۔