معروف شاعرہ ادا جعفری کا یوم پیدائش 22اگست کومنایا جا ئے گا

جمعرات 21 اگست 2025 15:51

فیصل آباد (اُردو پوائنٹ اخبارتازہ ترین - اے پی پی۔ 21 اگست2025ء) معروف شاعرہ ادا جعفری کا یوم پیدائش 22اگست کومنایا جا ئے گا۔ادا جعفری22 اگست 1924کو بھارت کے شہر بدایو ن میں پیدا ہو ئیں، ادا جعفری کا اصل نام عزیز جہاں تھا۔ انہوں نے 12 سال کی عمر میں شاعری شروع کی ۔ ادا جعفری تقسیم ہند کے بعد اپنے شوہر کے ساتھ کراچی آگئیں۔ انہیں نہ صرف پاکستان رائٹرز گلڈ اور حکومت پاکستان کی طرف سے کئی ایوارڈ ملے بلکہ شمالی امریکا اور یورپ میں بھی انہیں ان کی خدمات پر ایوارڈز سے نوازا گیا۔

انہوں نے جدید آرٹ میں بھی حصہ لیا۔ ادا جعفری کی شاعری میں خواتین کے حقوق کی جاتی ہے۔ انہوں نے نظمیں بھی لکھیں۔اس کے علاوہ انہوں نے اردو ہائیکو میں بھی اپنی صلاحیتوں کا مظاہرہ کیا۔

(جاری ہے)

1950میں ان کا پہلا شعری مجموعہ میں ساز ڈھونڈتی رہی شائع ہوا۔1967 میں انہیں ان کے دوسرے شعری مجموعے ’’شہر درد‘‘پرپاکستان رائٹرز گلڈکی طرف سے آدم جی ادبی ایوارڈ سے نوازا گیا۔

1981میں حکومت پاکستان نے اردو ادب کے لئے ان کی خدمات پر انہیں تمغہ امتیاز سے نوازا۔1984میں اکادمی ادبیات پاکستان کی طرف سے انہیں بابائے اردو ڈاکٹر مولوی عبدالحق ایوارڈ دیا گیا ، 1997میں انہیں قائداعظم ادبی ایوارڈ سے نواز گیا۔ بعد ازاں حکومت پاکستان نے انہیں 2002 میں تمغہ حسن کارکردگی سے نوازا۔ وہ 12مارچ 2015کو 90 برس کی عمر میں انتقال کر گئیں۔