محمد عامر کا ٹی ٹوئنٹی کرکٹ میں اہم کارنامہ، 400وکٹیں حاصل کرنیوالے دوسرے پاکستانی بائولر بن گئے

جمعرات 21 اگست 2025 21:38

اسلام آباد (اُردو پوائنٹ اخبارتازہ ترین - این این آئی۔ 21 اگست2025ء)قومی ٹیم کے سابق فاسٹ بولر محمد عامر ٹی ٹوئنٹی کرکٹ میں 400 وکٹیں حاصل کرنے والے دوسرے پاکستانی بولر بن گئے۔33سالہ فاسٹ بولر نے کیریبیئن پریمیئر لیگ میں فابیئن ایلن کو آؤٹ کرکے یہ اعزاز حاصل کیا۔وہ اب تک 343 ٹی ٹوئنٹی میچز میں 22.54 کی اوسط سے 400 وکٹیں حاصل کرچکے ہیں۔

(جاری ہے)

محمد عامر ٹی ٹوئنٹی کرکٹ میں 400 یا اس سے زائد وکٹیں حاصل کرنے والے مجموعی طور پر نویں اور دوسرے پاکستانی بولر ہیں۔

ٹی ٹوئنٹی کرکٹ میں سب سے زیادہ وکٹیں حاصل کرنے کا اعزاز افغانستان کے راشد خان کے پاس ہے جن کی وکٹوں کی تعداد 658 ہے۔ ویسٹ انڈیز کے ڈی جے براوو 631 وکٹوں کے ساتھ دوسرے نمبر پر ہیں۔ویسٹ انڈیز کے سنیل نارائن 590، جنوبی افریقہ کے عمران طاہر 549، بنگلہ دیش کے شکیب الحسن 499، ویسٹ انڈیز کے آندرے رسل 485، انگلینڈ کے کرس جورڈن 438 اور پاکستان کے وہاب ریاض 413 وکٹیں حاصل کرچکے ہیں۔