تعلیمی معیار اور طلبہ کے بہترین مفاد میں ٹیلی کام فاؤنڈیشن سکول سسٹم کا انقلابی قدم، تمام اساتذہ سے پرفارمنس بانڈ پر دستخط

جمعرات 21 اگست 2025 22:00

اسلام آباد (اُردو پوائنٹ اخبارتازہ ترین - اے پی پی۔ 21 اگست2025ء) وزارتِ انفارمیشن ٹیکنالوجی کے تحت قائم ٹیلی کام فاؤنڈیشن سکول سسٹم نے ایک انقلابی اور مثالی قدم اٹھاتے ہوئے اپنے تمام اساتذہ سے پرفارمنس بانڈ پر دستخط کرائے ہیں، اس اہم اقدام کا مقصد تعلیمی معیار کو مزید بلند کرنا، طلبہ کے بہترین مفاد کا تحفظ کرنا اور سکولوں میں مثبت و محفوظ تعلیمی ماحول کو یقینی بنانا ہے۔

اس بانڈ کے تحت اساتذہ نہ صرف معیاری تدریس کے پابند ہوں گے بلکہ طلبہ کو نجی ٹیوشن کی ترغیب دینے پر مکمل پابندی ہوگی جبکہ جسمانی سزا کے خلاف بھی واضح اور سخت ضابطہ نافذ کیا گیا ہے، یہ اقدام یقینی بناتا ہے کہ طلبہ کو ایک ایسا ماحول فراہم کیا جائے جہاں وہ اعتماد، عزت اور بہترین رہنمائی کے ساتھ اپنی صلاحیتوں کو پروان چڑھا سکیں۔

(جاری ہے)

وزارتِ آئی ٹی اور ٹیلی کام فاؤنڈیشن کی جانب سے اس فیصلہ کو ماہرینِ تعلیم نے ایک بہادرانہ اور قابلِ تقلید اقدام قرار دیا ہے۔

انہوں نےکہا کہ اس سے نہ صرف اساتذہ کی ذمہ داریوں کا تعین ہوگا بلکہ دیگر تعلیمی اداروں کے لئے بھی یہ ایک روشن مثال قائم کرے گا۔ٹیلی کام فاؤنڈیشن سکول سسٹم جو ملک بھر میں ہزاروں طلبہ کو تعلیم فراہم کر رہا ہے، نے اس اقدام کے ذریعہ واضح پیغام دیا ہے کہ تعلیم صرف کتابوں تک محدود نہیں بلکہ ایک ذمہ داری ہے اور یہ ذمہ داری اساتذہ اور اداروں دونوں کو مل کر نبھانی ہے۔یہ قدم پاکستان کے تعلیمی مستقبل کے لئے ایک سنگِ میل کی حیثیت رکھتا ہے اور یقینی طور پر دیگر اداروں کو بھی اسی روش پر چلنے کی ترغیب دے گا۔