بھارت نے پاکستان سے متعلق سپورٹس پالیسی بنا دی

بھارتی ٹیمیں پاکستان نہیں جائیں گی نہ پاکستانیوں کو بھارت میں کھیلنے کی اجازت ہوگی: بھارتی سپورٹس پالیسی

ذیشان مہتاب جمعہ 22 اگست 2025 12:39

بھارت نے پاکستان سے متعلق سپورٹس پالیسی بنا دی

نئی دہلی (اردو پوائنٹ تازہ ترین اخبار ۔ 22 اگست 2025ء ) بھارت کی وزارت سپورٹس نے پاکستان سے متعلق اپنی نئی سپورٹس پالیسی متعارف کروا دی ہے جس کے تحت بھارتی ٹیم پاکستان کے ساتھ صرف انٹرنیشنل ایونٹس میں ہی کھیلے گی ۔

(جاری ہے)

بھارتی وزارت کھیل کی جانب سے کہا گیا ہے کہ یہ پالیسی فوری نافذالعمل ہو گی جس کے مطابق بھارت ، پاکستان کے ساتھ دو طرفہ کھیلوں کے مقابلے میں حصہ نہیں لے گا، بھارتی ٹیمیں پاکستان نہیں جائیں گی اور نہ ہی پاکستانی ٹیموں کو بھارت میں کھیلنے کی اجازت ہو گی ، پاکستان کے ساتھ صرف بین الاقوامی مقابلوں میں ہی کھیلا جائے گا۔

بھارتی میڈیا کے مطابق وزارت کا کہنا تھا کہ ہم بھارتی کرکٹ ٹیم کو ایشائی کپ کھیلنے سے نہیں روکیں گے کیونکہ یہ کثیر الملکی ٹورنامنٹ ہے ۔

ایشیا کپ اگلے مہینے 9 ستمبر سے متحدہ عرب امارات میں شروع ہونے جارہا ہے جہاں پاکستان اور بھارت کے درمیان ٹکراؤ 14 ستمبر کو ہو گا ۔