Live Updates

ون ڈے میچز میں آسٹریلیا کے وکٹ کیپر بیٹر ایڈم گلکرسٹ کے خلاف کھیلتے ہوئے مشکل ہوئی، وسیم اکرم کا انکشاف

جمعہ 22 اگست 2025 16:53

کراچی (اُردو پوائنٹ اخبارتازہ ترین - این این آئی۔ 22 اگست2025ء)پاکستان کے سابق کپتان اور لیجنڈری فاسٹ بولر وسیم اکرم نے انکشاف کیا ہے کہ انہیں ون ڈے میچز میں آسٹریلیا کے وکٹ کیپر بیٹر ایڈم گلکرسٹ کے خلاف کھیلتے ہوئے مشکل ہوئی۔سابق کپتان وسیم اکرم سے پوڈکاسٹ میں جب ان سے بہترین بیٹر کا نام پوچھا گیا تو انہوں نے جواب میں بتایا کہ لوگ اکثر مجھ سے یہ سوال پوچھتے ہیں اور میری نظر میں سر ویوین رچرڈز بہترین بیٹر ہیں، میں یہ صرف ان کی شاندار بیٹنگ کی وجہ سے نہیں کہہ رہا بلکہ ان کا کردار بھی بہت زبردست تھا، وہ سب کے ہیرو تھے۔

وسیم اکرم سے اپنے دور کے 5 بہترین کرکٹرز کا نتخاب کرنے کو کہا گیا تو انہوں نے کہا کہ میرے لیے سب سے بہترین کرکٹر عمران خان ہیں کیونکہ انہوں نے پاکستان کے لیے بہت کچھ کیا، دوسرے نمبر پر ویو رچرڈز، تیسرے نمبر پر مارٹن کرو، چوتھے نمبر پر برائن لارا اور پانچویں نمبر پر سچن ٹنڈولکر ہیں۔

(جاری ہے)

انہوں نے کیریئر کے کچھ مشکل ترین مقابلوں کے بارے میں بات کرتے ہوئے بتایا کہ مجھے ون ڈے میچز میں ایڈم گلکرسٹ کے خلاف کھیلتے ہوئے مشکل ہوئی۔

وسیم اکرم سے کرکٹ کھیلنے کے لیے بہترین ممالک کے بارے میں پوچھا گیا تو انہوں نے جواب دیتے ہوئے کہا کہ کسی ایک ملک کا انتخاب کرنا مشکل ہے لیکن مجھے کرکٹ کھیلنے کے لیے انگلینڈ اپنی بھرپور تاریخ، بہترین سہولتوں اور آسان سفر کی وجہ سے خاص لگا۔اٴْنہوں نے بتایا کہ 1989ء میں جب ہم آسٹریلیا گئے تو عمران خان نے مجھ سے کہا تھا کہ اگر آپ آسٹریلیا کے خلاف ان کی اپنی کنڈیشنز میں اچھا پرفارم کرتے ہیں تو آپ کو فوراً پہچانا جائے گا اور بالکل ایسا ہی ہوا تو اس لیے آسٹریلیا بھی میرے لیے خاص ہے۔