بابر اور رضوان اندرونی سیاست کا شکار ہوئے، راشد لطیف کا دعویٰ

ورلڈ کپ 2024ء کے لیے دوبارہ کپتانی قبول کرنا بابر اعظم کی سب سے بڑی غلطی تھی : سابق کپتان

ذیشان مہتاب جمعہ 22 اگست 2025 15:40

بابر اور رضوان اندرونی سیاست کا شکار ہوئے، راشد لطیف کا دعویٰ

لاہور (اردو پوائنٹ تازہ ترین اخبار ۔ 22 اگست 2025ء ) سابق کپتان قومی کرکٹ ٹیم راشد لطیف نے بابر اعظم اور محمد رضوان کے ٹیم سے اخراج کو اندرونی سیاست کا شاخسانہ قرار دے دیا۔

تفصیلات کے مطابق خلیج ٹائمز کو دیے گئےانٹرویو میں راشد لطیف نے کہا کہ دونوں سابق کپتانوں کی کارکردگی میں کمی ضرور آئی ہے لیکن انہیں محض کرکٹنگ وجوہات نہیں بلکہ سیاست کی بناء پر ایشیا کپ سے باہر کیا گیا۔

ان کا کہنا تھا کہ پی سی بی میں جاری کھینچا تانی اور باہمی سیاست نے ملک کے دو بہترین کھلاڑیوں کو ذہنی طور پر نقصان پہنچایا۔

سابق کپتان کا کہنا تھا کہ پاکستان اس وقت آئی سی سی ٹی ٹونٹی رینکنگ میں آٹھویں نمبر پر ہے ،ایسی صورتحال میں بابر اور رضوان جیسے کھلاڑیوں کو نظرانداز کرنا سمجھ سے بالاتر ہے کیونکہ ہمارے پاس کوئی ڈان بریڈمین موجود نہیں ہے۔

(جاری ہے)

انہوں نے مزید کہا کہ بابر اعظم کے اسٹرائیک ریٹ پر سوال اٹھانا بھی ناانصافی ہے کیونکہ کرکٹ میں محض اسٹرائیک ریٹ سب کچھ نہیں ہوتا، کھیل کی سمجھ سب سے اہم ہے۔

راشد لطیف نے ورلڈ کپ 2024ء کے لیے دوبارہ کپتانی قبول کرنے کو بابر اعظم کی سب سے بڑی غلطی قرار دیتے ہوئے کہا کہ اس فیصلے نے ان کی بیٹنگ کو بْری طرح متاثر کیا۔

واضح رہے کہ ورلڈ کپ 2024ء میں گروپ مرحلے ہی میں باہر ہونے اور امریکا کے ہاتھوں عبرتناک شکست پر بابر اعظم نے کپتانی سے استعفیٰ دے دیا تھا۔

تاہم اس کے بعد سے وہ فارم میں واپس نہیں آ سکے، ان کی اوسط اس وقت 28.73 تک گر گئی ہے۔

راشد لطیف پْرامید ہیں کہ بابر اپنے مسائل پر قابو پاتے ہوئے دوبارہ وہی بیٹر بنیں گے جو دنیا کے بہترین کھلاڑیوں کی فہرست میں شامل تھا۔

سابق کپتان کے مطابق یہ تب ہی ممکن ہے جب بابر کو سیاست اور غیر ضروری دباؤ سے آزاد ماحول میسر آئے گا۔

راشد لطیف نے کہا کہ پاکستان میں اب یہ تاثر عام ہو رہا ہے کہ قومی ٹیم اور اس کی مینجمنٹ پر اسلام آباد یونائیٹڈ کا اثر غالب ہے۔ موجودہ کوچ مائیک ہیسن بھی 2023ء سے اس فرنچائزکے ساتھ منسلک ہیں۔