بابر اور رضوان ملکی کرکٹ کا اثاثہ ہیں ، شاہین نے ٹیم میں اختلافات کی افواہوں کو مسترد کردیا

نئے کھلاڑیوں پر اعتماد کر کے ہی ٹیم کو مستقبل کے لیے مضبوط بنایا جا سکتا ہے : فاسٹ باولر

ذیشان مہتاب ہفتہ 23 اگست 2025 11:49

بابر اور رضوان ملکی کرکٹ کا اثاثہ ہیں ، شاہین نے ٹیم میں اختلافات کی ..

دبئی (اردو پوائنٹ تازہ ترین اخبار ۔ 23 اگست 2025ء ) پاکستان کرکٹ ٹیم کے فاسٹ بولر شاہین شاہ آفریدی کا ایشیا کپ میں پاکستانی اسکواڈ میں بابر اعظم اور محمد رضوان کی غیر موجودگی پر ردعمل سامنے آگیا۔

بابر اور رضوان جو 2021ء کے ٹی ٹونٹی ورلڈ کپ کے بعد سے ہر بڑے ٹورنامنٹ میں پاکستان کی نمائندگی کرتے رہے لیکن بری فارم کی وجہ سے دونوں دسمبر 2024ء میں جنوبی افریقا کے خلاف سیریز کے بعد سے مختصر فارمیٹ میں پاکستانی ٹیم سے باہر ہیں۔

بابر اعظم اور رضوان کو ایشیا کپ اسکواڈ میں بھی شامل نہیں کیا گیا جس پر ان کے مداحوں اور سابق کرکٹرز نے سخت ردعمل دیا، تاہم شاہین نے نوجوان کھلاڑیوں کی حمایت پر زور دیا لیکن بابر اور رضوان کو ورلڈ کلاس پلیئرز قرار دیا۔

شاہین آفریدی نے جمعہ کو دبئی کرکٹ سٹیڈیم میں جاری ٹریننگ سیشن کے دوران کہا کہ میں بھی شاید مستقبل میں ٹیم کا حصہ نہیں رہوں ، سب کو موقع ملنا چاہیے۔

(جاری ہے)

بابر اور رضوان نے پاکستان کے لیے اچھی کرکٹ کھیلی ہے اور ان شاءاللہ دوبارہ کھیلیں گے لیکن نوجوانوں کو بھی موقع ملنا چاہیے اور ہمیں ان کا ساتھ دینا چاہیے۔

اس کے علاوہ شاہین آفریدی نے کہا کہ ایشیا کپ میں ہونے والے بڑے میچ کےلیے بہت اچھی تیاری ہو رہی ہے ، تین ملکی سیریز بھی ایشیا کپ کی تیاری میں مدد گار ثابت ہو گی، ٹی ٹونٹی فارمیٹ میں کوئی ٹیم آسان نہیں ہوتی ۔

فاسٹ بولر نے کہا کہ ٹیم کا پہلا ٹارگٹ سہ ملکی سیریز اور پھر ایشیا کپ ہدف ہے ۔ٹیم میں اختلافات سے متعلق باتیں باہر سے سنتے ہیں ، ٹیم میں ایسا کچھ نہیں ہے ،فیملی میں بھی چھوٹی موٹی چیزیں ہو جاتی ہیں ، لیکن یہ فیملی میں ہی رہنی چاہئیں ، ہمارا کام کرکٹ کھیلنا ، پاکستان کو خوشیاں دینا ہے ۔

واضح رہے کہ پاکستان ایشیا کپ سے قبل افغانستان اور میزبان متحدہ عرب امارات کے خلاف سہ فریقی ٹی ٹوئنٹی سیریز کھیلے گا جو 29 اگست سے 7 ستمبر تک جاری رہے گی ، جس کے بعد 9 ستمبر سے ایشیا کپ شروع ہوگا۔