وزیراعلیٰ گلگت بلتستان کی زیر صدارت کابینہ کا اجلاس ، حالیہ سیلاب اور لینڈ سلائیڈنگ سے ہونے والےجانی نقصان پرافسوس کا اظہار

ہفتہ 23 اگست 2025 17:55

گلگت (اُردو پوائنٹ اخبارتازہ ترین - اے پی پی۔ 23 اگست2025ء) وزیراعلیٰ گلگت بلتستان کی زیر صدارت کابینہ کا اجلاس منعقد ہوا جس میں گلگت بلتستان کے مختلف علاقوں میں حالیہ سیلاب اور لینڈ سلائیڈنگ سےہونے والی قیمتی انسانی جانوں کے ضیاع پر افسوس اظہار کیا گیا اور اجتماعی فاتحہ خوانی کی گئی۔اجلاس میں سوست سرحدی تجارت سے متعلق قائم کمیٹی کی سفارشات پر سیکرٹری خزانہ نے کابینہ کو تفصیلی بریفنگ دی۔

کابینہ نے اس اہم مسئلے کے پائیدار اور دیرپا حل کے لیے ایک نئی کمیٹی تشکیل دیدی،جو کابینہ کے اگلے اجلاس میں عوامی مفاد کو مدنظر رکھتے ہوئے اپنی سفارشات پیش کرے گی۔کمیٹی میں صوبائی وزیر انجینئر محمد انور،صوبائی وزیر پلاننگ راجہ ناصر علی خان،صوبائی وزیر صحت راجہ اعظم خان،معاونِ خصوصی برائے وزیراعلیٰ محمد علی قائد،سیکرٹری خزانہ گلگت بلتستان،سیکرٹری قانون حکومت گلگت بلتستان،اور سیکرٹری سروسز شامل ہیں۔

(جاری ہے)

اجلاس میں کمیٹی کو ہدایت دی گئی کہ وہ جامع سفارشات مرتب کرکے 28 اگست کو ہونے والے اگلے فورم میں پیش کرے۔ وزیراعلیٰ گلگت بلتستان نے کابینہ اجلاس میں اس معاملے کو انتہائی اہم قرار دیتے ہوئے کہا کہ اس پر کابینہ کی رائے لینا ضروری ہے اور آئندہ فیصلہ کمیٹی کی سفارشات کی روشنی میں کیا جائے گا۔کابینہ اجلاس میں وکلا برادری کے لیے چھ اضافی ملازمتوں کی تخلیق کے حوالے سے بھی غور کیا گیا، جس پر سیکرٹری قانون نے کابینہ کو بریفنگ دی۔

کابینہ نے فیصلہ کیا کہ اس ضمن میں وفاق کو ملازمتوں کی تخلیق کا کیس ارسال کیا جائے گا۔علاوہ ازیں کابینہ نے ویسٹ پاکستان موٹر وہیکل رولز 1969 میں مجوزہ ترامیم کی منظوری کا فیصلہ بھی کیا۔اس موقع پر وزیراعلیٰ گلگت بلتستان نے کہا کہ کوئی بھی قانون سے بالاتر نہیں ہے۔ ہمیں ہر حال میں قانون کی پاسداری کو یقینی بنانا ہوگا۔ گلگت بلتستان مزید کسی قسم کے انتشار کا متحمل نہیں ہوسکتا، ہماری اولین ترجیح گلگت بلتستان کی تعمیر و ترقی ہے۔