پاکستان ایتھلیٹکس فیڈریشن اور اسلام آباد ایتھلیٹکس ایسوسی ایشن کی یاسر سلطان کو شاندار کارکردگی پر مبارکباد

ہفتہ 23 اگست 2025 17:56

اسلام آباد (اُردو پوائنٹ اخبارتازہ ترین - اے پی پی۔ 23 اگست2025ء) پاکستان ایتھلیٹکس فیڈریشن کے صدر بریگیڈئیر ریٹائرڈ وجاہت حسین، سیکرٹری جنرل کرنل ریٹائرڈ شاہ جہاں میر اور اسلام آباد ایتھلیٹکس ایسوسی ایشن کے چیئرمین بریگیڈئیر ریٹائرڈ سلطان محمود ستی نےپاکستانی ایتھلیٹ محمد یاسر سلطان کو ایشیائی ایتھلیٹکس چیمپئن شپ میں شاندار کارکردگی پرمبارکباد دی ہے۔

انہوں نے اپنے ایک مبارکبادی پیغام میں کہا کہ یاسر سلطان نے ایک بار پھر ملک و قوم کا سر فخر سے بلند کر دیا۔ انہوں نے کہا کہ 27 سالہ اسٹار محمد یاسر سلطان نے ایشیائی ایتھلیٹکس چیمپئن شپ، موکپو (کوریا) میں شاندار کارکردگی کا مظاہرہ کرتے ہوئے 72.79 میٹر کے تھرو کے ساتھ کانسی کا تمغہ حاصل کیا۔ انہوں نےامید ظاہر کی یاسر سلطان آئندہ بھی بین الاقوامی سطح پر شاندار کارکردگی کا مظاہرہ کریں گے۔

(جاری ہے)

اس کے علاوہ انہوں نے یاسر سلطان کے کوچ فیاض بخاری کی کوششوں اور کاوشوں کی بھی تعریف کرتے ان کو مبارکباد دی اور کہا کہ فیاض بخاری پاکستانی تاریخ میں واحد کوچ ہیں جنہوں نے دو انٹرنیشنل میڈلسٹ تیار کئے جن میں ارشد ندیم اور محمد یاسر سلطان شامل ہیں۔ یہ اُن کی خاموش مگر عظیم قربانی ہے۔ واضح رہے کہ یاسر سلطان نے 2016 میں صرف 67.02 میٹر سے آغاز کیا۔امام رضا کپ (ایران، 2022) میں گولڈ جیتا۔ایشیائی ایتھلیٹکس (2023) میں شاندار 79.93 میٹر کے ساتھ برونز میڈل حاصل کیا اور 2024 میں ایک اور سلور میڈل اپنے نام کیا۔ اب 2025 میں کوریا میں ایشیائی ایتھلیٹکس چیمپئن شپ کانسی کا میڈل حاصل کیا۔