تحریک انصاف کے سابق چیئرمین کے خلاف 7 مقدمات میں دائر درخواست ضمانت بعد از گرفتاری سماعت کے لئے منظور‘نوٹس جاری

جمعرات 28 اگست 2025 22:41

راولپنڈی (اُردو پوائنٹ اخبارتازہ ترین - آن لائن۔ 28 اگست2025ء) انسدادِ دہشت گردی راولپنڈی کی خصوصی عدالت نے تحریک انصاف کے سابق چیئرمین کے خلاف 7 مقدمات میں دائر درخواست ضمانت بعد از گرفتاری سماعت کے لئے منظور کرلی ہے اور فریقین کو نوٹس جاری کرتے ہوئے یکم ستمبر کو مقدمات کا ریکارڈ طلب کرلیا ہے عدالت میں یہ درخواستیں تحریک انصاف کے 26 نومبر اور 28 ستمبر کے پرتشدد احتجاج کے مقدمات میں دائر کی گئی ہیں تحریک انصاف کے سابق چیئرمین کے وکیل سلمان صفدر اور حسنین مرتضی سنبل کی طرف سے یہ درخواستیں تھانہ نیو ٹاؤن میں 28 ستمبر 2024 کے مقدمہ نمبر 2831 اور 27 نومبر کے مقدمہ نمبر 3333، تھانہ وارث خان میں 29 ستمبر 2024 کے مقدمہ نمبر 1356، تھانہ سٹی میں 29 ستمبر 2024 کے مقدمہ نمبر 560، تھانہ سول لائن میں 28 ستمبر 2024 کے مقدمہ نمبر 1282، تھانہ ٹیکسلا میں 05 اکتوبر 2024 کے مقدمہ نمبر 2311 اور تھانہ نصیر آباد میں 05 اکتوبر 2024 کے مقدمہ نمبر 1282 میں دائر کی گئی ہیں انسداد دہشت گردی ایکٹ کے علاوہ اقدام قتل، اغوا اور مشاورت سمیت دیگر دفعات کے تحت درج ان مقدمات میں سابق چیئرمین پر گھیراؤ جلاؤ سازش کرنے اور قتل کے منصوبے سے متعلق سنگین الزامات عائد ہیں ان مقدمات میں پولیس نے جیل اسیری کے دوران پولیس نے سابق چیئرمین کو باضابطہ گرفتار کررکھا ہے جو جوڈیشل ریمانڈ پر ہیں۔