لاہور،خاتون سے زبردستی نکاح کروانے والے 3ملزمان گرفتار

شور کوٹ سے اغواء کی جانے والی خاتون کو بازیاب بھی کروا لیا گیا

جمعہ 29 اگست 2025 12:25

لاہور (اُردو پوائنٹ اخبارتازہ ترین - این این آئی۔ 29 اگست2025ء) نیوی راوی میں پولیس نے خاتون سے زبردستی نکاح کروانے والے 3 ملزمان کو گرفتار کر لیا۔موبائلز اسکواڈ کی قانون شکن عناصر کے خلاف سائینٹیفک بنیادوں پر کارروائیاں جاری ہیں، شور کوٹ سے اغوا کی جانے والی خاتون کو بازیاب بھی کروا لیا گیا۔ترجمان پولیس کے مطابق ملزمان گاڑی میں خاتون کو زبردستی اپنے ہمراہ لے جا رہے تھے، خاتون کے شور مچانے پر ناکہ انچارج نے گاڑی ڈرائیور کو رکنے کا اشارہ کیا لیکن ملزمان نے گاڑی بھگا دی، موثر حکمت عملی کے تحت رائونڈ اپ کرلیا۔

متاثرہ خاتون نے بتایا کہ تینوں ملزمان نے زبردستی مجھ سے نکاح نامے پر دستخط کروائے، میرا نکاح زبردستی ہیبت خان سے کروایا گیا۔ڈی ایس پی مبشر اعوان کے مطابق خاتون نے ناکہ انچارج کو اغوا اور جعلی نکاح کی روداد بیان کی، ملزمان نے آپسی رنجش کا بدلہ لینے کے لیے خاتون کو شورکوٹ سے اغواء کیا۔

(جاری ہے)

ترجمان پولیس کے مطابق ناکہ انچارج و جوانوں کی حاضر دماغی نے خاتون کو اغوا ہونے سے بچا لیا۔

گرفتار ملزمان ہیبت، سرفراز، سدا بہار اور مغویہ خدیجہ کو قانونی کارروائی کے لیے تھانہ شاہدرہ ٹائون کے حوالے کر دیا گیا۔ایس پی موبائلز ارسلان زاہد کی طرف سے ناکہ انچارج و ٹیم کو شاباش و تعریفی اسناد کا اعلان کیا گیا۔ انہوں نے کہا کہ شہر کے داخلی و خارجی راستوں پر کڑی نگرانی کا عمل جاری رہے گیا۔