ہربھجن سنگھ کی سری سانتھ کو تھپڑ مارنے کی ان دیکھی ویڈیو وائرل

ہفتہ 30 اگست 2025 12:58

نئی دہلی (اُردو پوائنٹ اخبارتازہ ترین - این این آئی۔ 30 اگست2025ء)آئی پی ایل کے بانی اور سابق چیئرمین للت مودی نے پہلی بار 2008 میں لیگ کے افتتاحی سیزن میں ہربھجن سنگھ اور سری سانتھ کے جھگڑے کی ان دیکھی فوٹیج جاری کردی۔بیونڈ 23 کرکٹ پوڈ کاسٹ پر سابق آسٹریلوی کپتان مائیکل کلارک سے گفتگو کرتے ہوئے للت مودی نے اس غیرترمیم شدہ کلپ کو شیئر کیا ہے۔

مودی نے انکشاف کیا کہ میچ ختم ہوچکا تھا، کیمرے بھی بند ہوگئے تھے لیکن میرا ایک سیکیورٹی کیمرا آن تھا اس میں سری سانتھ اور بھجی کے درمیان ہونے والے واقعہ محفوظ ہوگیا، بھجی اسے تھپڑ مارتا ہے۔انہوں نے کہا کہ یہ ویڈیو کو میں نے اتنے عرصے جاری نہیں کیا تھا اب اہم 18 سال پیچھے ہیں۔واضح رہے کہ جھگڑا ممبئی انڈینز اور کنگز الیون پنجاب (پنجاب کنگز) کے درمیان میچ کے بعد پیش آیا تھا اور لیگ کے سیاہ ترین لمحات میں سے ایک بن گیا تھا اور اسے ’سلیپ گیٹ‘ کا نام سے جانا جانے لگا۔

(جاری ہے)

حال ہی میں ہربھجن سنگھ نے خود اعتراف کیا تھا کہ یہ واقعہ ان کے کیریئر کا سب سے بڑا افسوس ہے۔روی چندر ایشون کے یوٹیوب شو میں بات کرتے ہوئے ہربھجن نے کہا تھا کہ میں اپنی زندگی میں ایک چیز جو تبدیل کرنا چاہتا ہوں وہ سری سانتھ کے ساتھ واقعہ ہے، جو ہوا وہ غلط تھا اور مجھے ایسا نہیں کرنا چاہیے تھا، میں نے 200 بار معافی مانگی اور برسوں بعد بھی جب یہ موضوع آتا ہے تو میں خود کو معافی مانگتا ہوا پاتا ہوں۔

انہوں نے کہا کہ مجھے سب سے زیادہ تکلیف اس وقت ہوئی جب میں ان کی بیٹی سے ملا اور اس نے مجھ سے بات کرنے سے انکار کرتے ہوئے کہا کہ‘میں آپ سے بات نہیں کرنا چاہتی، آپ نے میرے والد کو مارا۔’میرا دل ٹوٹ گیا۔‘ہربھجن سنگھ نے کہا کہ میں خود سے پوچھتا رہا کہ میں نے اس پر کیا تاثر چھوڑا ہے، وہ مجھے صرف اس شخص کے طور پر دیکھے جس نے اس کے باپ کو مارا تھا۔ میں اب بھی اس کی بیٹی سے معافی مانگتا ہوں۔