سلمان آغا افغانستان کیخلاف سب سے بہترین سکور بنانے والے پاکستانی کپتان بن گئے

انہوں نے 36 گیندوں پر 3 چوکوں اور 3 چھکوں کی مدد سے 53 رنز سکور کیے

ذیشان مہتاب ہفتہ 30 اگست 2025 12:47

سلمان آغا افغانستان کیخلاف سب سے بہترین سکور بنانے والے پاکستانی کپتان ..

شارجہ (اردو پوائنٹ تازہ ترین اخبار ۔ 30 اگست 2025ء ) قومی ٹی ٹونٹی ٹیم کے کپتان سلمان علی آغا تین ملکی سیریز کے پہلے میچ میں شاندار باری کھیل کر افغانستان کیخلاف سب سے بہترین سکور کرنے والے پاکستانی کپتان بن گئے۔

سلمان آغا نے سہ ملکی سیریز کے پہلے مقابلے میں شاندار بیٹنگ کا مظاہرہ کرتے ہوئے 36 گیندوں پر 3 چوکوں اور 3 چھکوں کی مدد سے 53 ناٹ آئوٹ رنز کی باری کھیلی جو کسی بھی پاکستانی کپتان کا ٹی ٹونٹی کرکٹ میں افعانستان کیخلاف سب سے بڑا سکور ہے۔

اس سے قبل سابق کپتان بابر اغظم نے ٹی ٹونٹی ورلڈ کپ 2021ء میں افغانستان کیخلاف میچ میں 51 رنز سکور کیے تھے جب کہ محمد حفیظ نے 2013ء میں 42 ناٹ آئوٹ رنز بنائے تھے۔

واضح رہے کہ سہ فریقی سیریز کے پہلے میچ میں پاکستان نے افغانستان کو 39 رنز سے شکست دے دی، شارجہ میں کھلے گئے میچ میں افغانستان کی ٹیم 183 رنز کے تعاقب میں 19.5 اوورز میں 143 رنز بنا کر آؤٹ ہوگئی۔

(جاری ہے)

افغانستان کی جانب سے کپتان راشد خان 39 رنز بنا کر نمایاں رہے، رحمان اللہ گربز 38، صدیق اللہ اٹل 23، درویش رسولی 21، ابراہیم زادران 9، مجیب الرحمان 4، محمد نبی 3 اور فرید احمد 1 رن کے انفرادی اسکور پر آؤٹ ہوئے جبکہ کریم جنت اور عظمت اللہ عمرزئی بغیر کھاتا کھولے پولین لوٹے، فضل حق فاروقی 1 رن بنا کر ناٹ آؤٹ رہے۔

پاکستان کی جانب سے حارث رؤف نے 4 کھلاڑیوں کو آؤٹ کیا، شاہین شاہ آفریدی، محمد نواز اور سفیان مقیم نے 2، 2 وکٹیں حاصل کیں۔

اس سے قبل پاکستان نے ٹاس جیت کر پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 182 رنز اسکور کیے، شاہینوں کی جانب سے کپتان سلمان آغا 53 رنز ناٹ آؤٹ بنا کر نمایاں رہے، صاحبزادہ فرحان 21، محمد نواز 21، فخر زمان 20، محمد حارث 15، فہیم اشرف 14، صائم ایوب 14 اور حسن نواز 9 کے انفرادی اسکور پر آؤٹ ہوئے۔

افغانستان کی جانب سے فرید احمد نے 2 جبکہ مجیب الرحمان، محمد نبی، کپتان راشد خان اور عظمت اللہ عمرزئی نے 1، 1 وکٹ حاصل کی۔