پنجاب میں سیلاب سے 15لاکھ 16ہزار لوگ متاثر، 30افراد جاں بحق ہوئے‘ مریم اورنگزیب

لاہور (اُردو پوائنٹ اخبارتازہ ترین - این این آئی۔ 30 اگست2025ء) سینئر صوبائی وزیر مریم اورنگزیب نے کہا ہے کہ پنجاب میں تین دریائوں کے سیلابی پانی سے دو ہزار موضع جات، 15لاکھ 16ہزار 603لوگ متاثر ہوئے ہیں، جاں بحق افراد کی تعداد 30ہو گئی۔انہوں نے اپنے ایک بیان میں کہا کہ وزیراعلی مریم نواز شریف مشکل کی اس گھڑی میں عوام کے ساتھ ہیں، عوام کی خدمت اور مدد کا تاریخی ریلیف آپریشن وزیراعلی کی براہ راست نگرانی میں تیزی سے جاری ہے۔

مریم اورنگزیب نے کہا کہ تمام ادارے ایک مٹھی بن کر عوام کی مدد میں سرگرم عمل ہیں، وزیراعلی مریم نواز کی ہدایت پر وزرا، ارکان اسمبلی، ضلعی انتظامیہ، ریسکیو 1122، پولیس، سول ڈیفنس سمیت تمام ادارے امدادی کاموں میں مصروف ہیں۔انہوں نے بتایا کہ پنجاب کی تاریخ کے تباہ کن سیلاب میں عوام کی جان بچانے اور محفوظ مقامات پر منتقل کرنے کا گرینڈ ریسکیو آپریشن پوری رفتار، مشینری اور وسائل سے جاری ہے۔

(جاری ہے)

مریم اورنگزیب نے کہا کہ وزیراعلی مریم نواز شریف ریسکیو آپریشن کی نگرانی کر رہی ہیں، امدادی کاموں کا مسلسل جائزہ لے رہی ہیں، پنجاب میں سیلاب سے جاں بحق افراد کی تعداد 30ہو گئی، تین دریائوں کے سیلابی پانی سے دو ہزار 38موضع جات متاثر ہوئے ہیں ، دریائے چناب سے 1ہزار 169، راوی سے 462اور ستلج میں سیلاب سے 391موضع جات متاثر ہوئے ہیں، 15لاکھ 16ہزار 603لوگ متاثر ہوئے ہیں۔

انہوں نے کہا کہ سیلاب متاثرہ علاقوں سے 4 لاکھ 81ہزار سے زائد لوگوں کو محفوظ مقامات پر منتقل کیا گیا ،511ریلیف اور 351میڈیکل کیمپس متاثرین کی چوبیس گھنٹے مدد اور دیکھ بھال کر رہے ہیں، 6ہزار 373متاثرین ریلیف کیمپس میں ہیں۔سینئر صوبائی وزیر نے بتایا کہ 4لاکھ 5ہزار سے زائد مویشیوں کو محفوظ مقامات پر منتقل کیا گیا، مویشیوں کے علاج کے لئے 321ویٹرنری کیمپ بھی کام کر رہے ہیں، سیلاب کی صورتحال کے پیش نظر کشتیوں کی تعداد 808ہو گئی جو ریسکیو مشن میں شریک ہیں، 36گھنٹوں میں 68ہزار 477 لوگوں کو ریسکیو کیا گیا۔

مریم اورنگزیب نے کہاکہ وزیراعلی مریم نواز شریف کے پیشگی حفاظتی انتظامات اور تجاوزات کے خلاف آپریشن کی وجہ سے تاریخ کے اتنے بڑے سیلاب میں بڑے جانی نقصان سے پنجاب بچ گیا، الحمدللہ، موسمیاتی تبدیلی تباہی میں بدل چکی ہے، پیشگی خبردار کرنے والے جدید ترین نظام پنجاب میں لائیں گے۔سینئر صوبائی وزیر نے کہا کہ سیلاب سے بحالی کے بعد تجاوزات کے خاتمے کا آپریشن ہوگا،حالیہ سیلاب میں ہونے والے تجربات کی روشنی میں جامع حکمت عملی تیار کریں گے، ریسکیو اور ریلیف میں دن رات کام کرنے والے ہمارے ہیروز ہیں، متاثرین کی بحالی اور نقصانات کا ازالہ اولین ترجیح ہے۔