Live Updates

بھارتی آبی جارحیت اور موسمیاتی تبدیلیوں کے اثرات سے مشترکہ چیلنجز کا سامنا ہے،خواجہ سلمان رفیق

ہفتہ 30 اگست 2025 16:08

قصور (اُردو پوائنٹ اخبارتازہ ترین - اے پی پی۔ 30 اگست2025ء) صوبائی وزیر و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے سیلابی صورتحال کا جائزہ لینے کیلئے قصور کا ہنگامی دورہ کیا۔ ڈپٹی کمشنر عمران علی اور ڈی پی او محمد عیسیٰ نے زمینی صورتحال اور ضلع میں جاری امدادی کارروائیوں بارے تفصیلی بریفنگ دیتے ہوئے بتایا کہ قصور کے 72 موضع جات متاثرہوئے ہیں جن میں امدادی سرگرمیوں کیلئے 74 کشتیاں پانی میں موجود ہیں۔

تلوار پوسٹ، اتر سنگھ والا،کوٹھی فتح محمد میں آرمی اور پولیس کے 300 دستوں کی مدد سے لوگوں کا انخلاء یقینی بنایا جارہا ہے۔ 18 ہزار 308 افراد اور 36 ہزار 129 جانوروں کو محفوظ مقامات پر منتقل کیا جاچکا ہے۔ تمام محکمے الرٹ ہیں کسی بھی ہنگامی صورتحال پر فوری ریسپانس کررہے ہیں ۔

(جاری ہے)

سیلاب متاثرین کے جان و مال کے تحفظ کیلئے افسران و عملہ پوری طرح متحرک ہوکر فرائض سرانجام دے رہے ہیں۔

صوبائی وزیر و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے ضلعی انتظامیہ کو ہمہ وقت الرٹ رہنے کی ہدایت کی ۔انہوں نے مقامی نمائندوں اور سیلاب متاثرین سے ملاقات بھی کی ۔ بھارتی آبی جارحیت اور موسمیاتی تبدیلیوں کے اثرات سے مشترکہ چیلنجز کا سامنا ہے۔ 1988 کے بعد کا سب سے بڑا سیلابی ریلا،گنڈا سنگھ والاکے مقام پر پانی کا بہاؤ 2 لاکھ 53ہزار 68کیوسک ہے۔

سیلاب سے متاثرہ علاقوں کے لوگوں کو کیمپس میں خوراک اور جانوروں کے چارے تقسیم کیے جارہے ہیں۔ ضلع قصور سنٹرل مانیٹرنگ روم، چونیاں،قصور اور پتوکی میں بڑے کیمپس فعال کر دیے گئے ہیں۔ سیلاب متاثرین کو فلڈ ریلیف کیمپس میں رہائش ، خوراک ، پانی و دیگر سہولیات کی فراہمی کو بروقت یقینی بنایا جائے۔ وزیراعلیٰ پنجاب مریم نوازشریف کی ہدایت پر حکومت سیلاب متاثرین کی جان و مال کے تحفظ کیلئے دن رات کوشاں ہے۔ عوام سے گزارش ہے کہ سیلاب زدہ اور نشیبی علاقوں میں آنے سے گریز کریں۔\378