پنجاب بار کونسل کے انتخابات،امیدواروں کی انتخابی مہم شروع، ضابطہ اخلاق بھی جاری

اتوار 31 اگست 2025 18:30

لاہور (اُردو پوائنٹ اخبارتازہ ترین - اے پی پی۔ 31 اگست2025ء) پنجاب بار کونسل کے لاہور سمیت صوبے بھر سے پانچ سالہ مدت کے لئے ارکان کے چنائو کیلئے امیدواروں کی انتخابی مہم میں تیزی آنے لگی، امیدواروں نے حامیوں کے ساتھ ڈور ٹو ڈور الیکشن مہم شروع کر دی، لاہور ہائیکورٹ میں بھی ممبر پنجاب بار کونسل کے امیدوار الیکشن مہم چلا رہے ہیں ۔ تفصیلات کے مطابق پنجاب بار کونسل کے انتخابات نومبر میں لاہور سمیت صوبہ بھر میں منعقد ہوں گے،بار کونسل الیکشن 2025 تا 2030 کے الیکشن میں کیو آر کوڈ حاصل کرنیوالے رجسٹرڈ وکلا ہی ووٹ ڈال سکیں گے ،اس حوالے سے وکلا کو 30 ستمبر تک اپنی رجسٹریشن کروانے کی ہدایت کی گئی ہے ۔

پنجاب بار کونسل الیکشن کے لئے رولز کے تحت ایڈووکیٹ جنرل پنجاب امجد پرویز ریٹرننگ افسر ہوں گے۔

(جاری ہے)

یاد رہے کہ بار کونسل رولز کے تحت ایڈوکیٹ جنرل بربنائے عہدہ بار کونسل کا چیئرمین اور الیکشن عمل کو انجام دینے کے لئے ریٹرننگ افسر بھی ہوتا ہیں،پنجاب بار کونسل نے امیدواروں کے لیے ضابطہ اخلاق پر سختی سے عمل درآمد کو یقینی بنانے کا فیصلہ بھی کیا ہے۔

پنجاب بار کونسل کے مطابق امیدواروں کو بینرز، پینا فلیکس، ہورڈنگز، اشتہارات اور سٹیکرز کے استعمال سے روک دیا گیا ہے، امیدواروں یا ان کے حامیوں کو اسلحہ کی نمائش سے بھی باز رہنے کی ہدایت کی گئی ہے۔ ضابطہ اخلاق کے مطابق امیدوار نہ تو ووٹرز کے گھروں میں جا کر ووٹ مانگ سکیں گے اور نہ ہی کھانے، چائے یا دیگر ضیافت دے سکیں گے، امیدوار صرف ذاتی ملاقات، خط یا پانچ بائی تین انچ کے سپیشل وزٹنگ کارڈ کے ذریعے ووٹرز سے رابطہ کر سکیں گے، قواعد کی کسی بھی خلاف ورزی کو "مس کنڈکٹ" تصور کیا جائے گا۔

ضابطہ اخلاق میں مزید کہا گیا ہے کہ خلاف ورزی کرنے والے امیدوار کے خلاف سخت کارروائی کی جائے گی اور الیکشن لڑنے کے لیے نااہلی کا سامنا بھی کرنا پڑ سکتا ہے۔ اس سلسلے میں چند روز قبل پنجاب بار کونسل میں ایک کنونشن منعقد ہوا جس میں وائس چیئرمین پنجاب بار کونسل، چیئرمین ایگزیکٹو کمیٹی، سیکرٹری پنجاب بار کونسل اور ریٹرنگ افسر نے شرکت کی۔ کنونشن میں متوقع امیدواروں کی بڑی تعداد بھی شریک ہوئی، کنونشن میں اس بات پر اتفاق کیا گیا کہ انتخابات کو شفاف اور غیر جانبدارانہ بنانے کیلئے ضابطہ اخلاق پر ہر صورت عمل درآمد یقینی بنایا جائے گا۔