Live Updates

محکمہ لائیو اسٹاک شہید بینظیرآباد کی جانب سے سیلاب متاثرہ علاقوں میں ویکسی نیشن کیمپ، 50 ہزار سے زائد مویشیوں کو حفاظتی ٹیکے لگائے گئے

پیر 1 ستمبر 2025 12:40

حیدرآباد (اُردو پوائنٹ اخبارتازہ ترین - اے پی پی۔ 01 ستمبر2025ء) محکمہ لائیو اسٹاک شہید بینظیرآباد کی جانب سے سیلاب متاثرہ علاقوں میں مویشیوں کے لیے ویکسی نیشن کیمپ قائم کیے گئے ہیں، جہاں روزانہ کی بنیاد پر جانوروں کو مختلف بیماریوں سے بچاؤ کے حفاظتی ٹیکے لگائے جا رہے ہیں۔

(جاری ہے)

ڈپٹی ڈائریکٹر لائیو اسٹاک ڈاکٹر اعجاز احمد لغاری نے بتایا کہ کمشنر شہید بینظیرآباد ندیم احمد ابڑو اور ڈپٹی کمشنر عبدالصمد نظامانی کی خصوصی ہدایت پر دریائے سندھ میں آنے والے سیلاب سے متاثرہ کچے کے علاقے بچل پور، دولت پور صفن اور مڈ بنگلو میں ویکسی نیشن کیمپ قائم کیے گئے ہیں۔

ان کے مطابق اب تک 50 ہزار سے زائد بڑے اور چھوٹے جانوروں کو حفاظتی ویکسین فراہم کی جا چکی ہے تاکہ انہیں وبائی امراض سے محفوظ رکھا جا سکے۔دوسری جانب ڈپٹی ڈائریکٹر پولٹری پروڈکشن طارق علی نورانی نے بتایا کہ سیلاب متاثرین کی مرغیوں کو حفاظتی ٹیکے لگانے کے لیے مڈ بند پر خصوصی میڈیکل کیمپ قائم کیا گیا ہے۔