کراچی میں چپ تعزیے کے جلوس مقررہ راستوں سے ہوتے ہوئے اختتام پذیر ہو گئے

منگل 2 ستمبر 2025 15:59

کراچی(اُردو پوائنٹ اخبارتازہ ترین - این این آئی۔ 02 ستمبر2025ء)شہادت امام حسن عسکری کے سلسلے میں کراچی میں چپ تعزیے کے جلوس مقررہ راستوں سے ہوتے ہوئے اختتام پذیر ہو گئے ۔تفصیلات کے مطابق شہادت امام حسن عسکری کے سلسلے میں کراچی میں چپ تعزیے کا پہلا جلوس نشترپارک سے برآمد ہوکر نور باغ مسافر خانہ کھارا در پہنچ کر پر امن طور پر ختم ہوگیا جبکہ دوسرا مرکزی جلوس جوکہ بعد نماز ظہرین گولیمار میں واقع امام بارگاہ قصر مصیب سے برآمد ہوا اور مقررہ راستوں سے ہوتاہواامام بارگاہ شاہ نجف مارٹن کوارٹرز پراختتام پذیرہوا۔

چپ تعزیے کا پہلا جلوس صبح 8 بجے نشتر پارک سے بر آمد ہوا، جلوس سے قبل بعد نماز فجر مجلس برپا کی گئی، جس سے علامہ باقر زیدی نے خطاب کیا، امام حسن عسکر ی کے فضائل اور ان کی زندگی پر روشنی ڈالی اور شہدائے کربلا کی لازوال قربانیوں کو بیان کیا،۔

(جاری ہے)

مجلس کے بعد عماری کا جلوس برآمد ہوا، عزادار رسول اللہ ﷺ کو ان کے نواسوں کا پرسہ دیتے رہے۔جلوس کی قیادت بوتراب اسکائوٹس نے کی،جلوس میں شریک عزاداران شہدائے کربلا کی یاد میں نوحہ خوانی کرتے رہے۔

نشتر پارک سے برآمد ہونے والا جلوس نمائش، ایم اے جناح روڈ، صدر، تبت سینٹر، عید گاہ، لائٹ ہاوس اور بولٹن مارکیٹ،امام بارگاہ حسینیاں ایرانیاں کھارادر سے ہوتا ہوا نور باغ مسافر خانہ پرختم ہوا،چپ تعزیہ کا دوسرا جلوس بعد نماز ظہرین قصر مصیب رضویہ سے برآمد ہوکر لسبیلہ، پرانا لیاقت آباد، جیل روڈ سے ہوتا ہوا امام بارگاہ شاہ نجف مارٹن کواٹرز پر اختتام پذیر ہوا۔جلوسوں کی سیکیورٹی کے لئے خصوصی انتظامات کئے گئے تھے