قرآن و سنت کی بالادستی اور اسلامی نظام کیلئے جدوجہدکررہے ہیں‘مقررین

ہمارا مقصد صرف اقتدار نہیں بلکہ ایک ایسے نظام کا نفاذ ہے جو قرآن و سنت کے مطابق ہو

منگل 2 ستمبر 2025 16:43

لاہور (اُردو پوائنٹ اخبارتازہ ترین - این این آئی۔ 02 ستمبر2025ء)جماعت اسلامی پی پی 145 کے زیراہتمام ایک عظیم الشان ممبرز کنونشن کا انعقاد کیا گیا جس میں بڑی تعداد میں مرد، خواتین اور بچوں نے شرکت کی۔ اس باوقار تقریب سے امیر جماعت اسلامی لاہور ضیائالدین انصاری ایڈووکیٹ، امیر جماعت اسلامی شمالی لاہور پروفیسر عثمان افضل، احمد مکی، اور جہانگیر خان نے خطاب کیا۔

کنونشن میں نائب امیر جماعت اسلامی پاکستان ڈاکٹر اسامہ رضی، مشتاق بٹ، قاری شیر عباس، ہارون الرشید اور دیگر قائدین بھی شریک ہوئے۔ شرکاء ممبرز کنونشن نے جماعت اسلامی کی قیادت پر مکمل اعتماد کا اظہار کرتے ہوئے اسلامی نظام کے نفاذ کی جدوجہد کو بھرپور انداز میں آگے بڑھانے کے عزم کا اعادہ کیا۔اس موقع پر خطاب کرتے ہوئے امیر جماعت اسلامی لاہور ضیاء الدین انصاری ایڈووکیٹ نے کہا کہ قرآن و سنت کی بالادستی اور اسلامی نظام کیلئے جدوجہدکررہے ہیں۔

(جاری ہے)

پاکستان گزشتہ 78 برسوں سے ایک ہی فرسودہ نظام کے تسلط میں ہے، جس نے عوام کو نہ تو حقیقی تبدیلی دی اور نہ ہی خوشحالی۔ جماعت اسلامی نظام کی تبدیلی کی علمبردار ہے اور عدل و انصاف پر مبنی ایک حقیقی اسلامی فلاحی ریاست کا قیام چاہتی ہے۔انہوں نے کہا کہ جماعت اسلامی کی جدوجہد طاغوت اور سامراجی قوتوں کے خلاف ہے، جو اس ملک کے نظریاتی و معاشی ڈھانچے کو کمزور کرنا چاہتے ہیں۔ جماعت اسلامی قرآن و سنت کی بالادستی پر مکمل یقین رکھتی ہے اور ہم پرامن اسلامی انقلاب کے لیے جدوجہد کر رہے ہیں۔قائدین نے کہا کہ ہمارا مقصد صرف اقتدار نہیں بلکہ ایک ایسے نظام کا نفاذ ہے جو قرآن و سنت کے مطابق ہو اور جس میں ہر فرد کو انصاف، تعلیم، صحت اور روزگار کی ضمانت حاصل ہو۔