سعودی عرب میں پہلی دو روزہ ثقافتی سرمایہ کاری کانفرنس 29 ستمبر کو ریاض میں ہو گی

بدھ 3 ستمبر 2025 10:20

ریاض (اُردو پوائنٹ اخبارتازہ ترین - اے پی پی۔ 03 ستمبر2025ء) سعودی عرب میں پہلی ثقافتی سرمایہ کاری کانفرنس 29 اور 30 ستمبر کو ریاض کے کنگ فہد ثقافتی مرکز میں ہو گی۔ اردو نیوز کے مطابق کانفرنس کا انعقادسعودی ولی عہد و وزیر اعظم شہزادہ محمد بن سلمان بن عبدالعزیز کی زیر سرپرستی اور وزارت ثقافت کے زیر انتظام ہو گا۔

(جاری ہے)

کانفرنس میں مقامی اور عالمی سطح پر ثقافتی امور میں دلچسپی رکھنے والے سرکاری اور نجی اداروں کے شرکا کو ایک پلیٹ فارم پر جمع کیا جائےگا ،جوثقافتی سرمایہ کاری کے مستقبل پر تبادلہ خیال کریں گے۔

یہ سعودی عرب میں اپنی نوعیت کی ہونے والی پہلی ثقافتی کانفرنس ہوگی۔کانفرنس میں 38 اجلاس ہوں گے جس میں مختلف ممالک سے 100 سےزیادہ ماہرین خطاب کریں گے۔سعودی وزیر ثقافت شہزادہ بدر بن فرحان نے کہا کہ کانفرنس ثقافتی منصوبوں کے فروغ کے حوالے سے سرمایہ کاری کی ترغیب دینے کے علاوہ تخلیقی شعبوں میں کاروباری افراد کی حوصلہ افزائی کےلیے اہم ثابت ہوگی ۔