وسیم اکرم کا بابر اعظم کو بطور اینکر کھلانے کا مشورہ

بابر اعظم کو اگلے ٹی ٹوئنٹی میچز میں مڈل آرڈر میں بطور اینکر شامل کریں

بدھ 3 ستمبر 2025 11:55

لاہور(اُردو پوائنٹ اخبارتازہ ترین - این این آئی۔ 03 ستمبر2025ء)پاکستان کے سابق کپتان اور سوئنگ کے سلطان وسیم اکرم نے قومی ٹیم کو مشورہ دیتے ہوئے کہا کہ بابر اعظم کو اگلے ٹی ٹوئنٹی میچز میں مڈل آرڈر میں بطور اینکر شامل کریں۔نجی ٹی وی پروگرام کے دوران انہوں نے ایک سیگمنٹ میں کھیل کے شعبے سے منسلک مختلف شخصیات کو اہم مشورے بھی دیے۔اسی سیگمنٹ میں انہوں نے اپنے خیالات کا اظہار کرتے ہوئے کہا کہ پاکستان کو بڑے ٹورنامنٹس میں جب دباؤ زیادہ ہوتا ہے تو اٹیکنگ مائنڈ سیٹ کے ساتھ تکنیکی طور پر مضبوط بلے باز کی ضرورت ہے۔

اس کے ساتھ انہوں نے بابر اعظم کو درپیش مشکلات کے بارے میں بھی بات کی۔ایک سوال کا جواب دیتے ہوئے انہوں نے کہا کہ ابھی ہم بنگلا دیش سے ہارے ہیں، جبکہ ویسٹ انڈیز کے خلاف سیریز 2-1 سے جیتی، لیکن مجھے لگتا ہے کہ ابھی بھی تھوڑی مستقل مزاجی کی ضرورت ہے۔

(جاری ہے)

آگے بڑی سیریز آ رہی ہیں، ایشیا کپ آرہا ہے، پھر اگلے سال ورلڈ کپ ہے۔ مجھے تشویش ہے کہ تیسرے یا چوتھے نمبر پر اٹیکنگ مائنڈ سیٹ کے ساتھ کھیلنے والا بلے باز نہیں ہے۔

انہوں نے کہا کہ اگر آپ کو ناک آؤٹ میچ میں 140 یا 145 کا تعاقب کرنا ہے، مثال کے طور پر آپ کو انگلینڈ، آسٹریلیا، ہندوستان یا انگلینڈ کے خلاف میچ میں ایک اینکر کی ضرورت ہے جس کا اسٹرائیک ریٹ بھی اچھا ہو، کوئی ایسا جس کی تکنیک اچھی ہو اور وہ اٹیکنگ شاٹس بھی کھیل سکتا ہو۔وسیم اکرم نے بابر اعظم کو ان کی سابقہ پرفارمنس کی بنیاد پر تجویز دی کہ اگر ٹی ٹوئنٹی میں، اگر آپ اسے (بابر اعظم کو) تیسرے نمبر پر کھلاتے ہیں، جیسا کہ انہوں نے سمرسیٹ کے لیے 140 کے اسٹرائیک ریٹ کے ساتھ کھیلا، تو وہ اچھا پرفارم کر سکتے ہیں۔