Live Updates

جنوبی پنجاب کے سیلاب متاثرہ علاقوں میں پاک فوج، سول انتظامیہ و دیگر اداروں کی امدادی سرگرمیاں جاری

بدھ 3 ستمبر 2025 13:10

اسلام آباد (اُردو پوائنٹ اخبارتازہ ترین - اے پی پی۔ 03 ستمبر2025ء) جنوبی پنجاب کے سیلاب متاثرہ علاقوں میں پاک فوج، سول انتظامیہ و دیگر اداروں کی امدادی سرگرمیاں جاری ہیں، دریائے ستلج کے نزدیک مصافاتی علاقوں میں پاک فوج اور سول انتظامیہ کے 12 ریلیف کیمپ قائم کئے گئے ہیں۔ بدھ کو جاری تفصیلات کے مطابق دریائے ستلج میں گنڈا سنگھ والا پر حفاظتی بند ٹوٹ گیا ہے ، ہیڈ سلیمانکی پر اونچے درجے کا سیلاب ہے، دریائے ستلج کے نزدیک مصافاتی علاقوں میں پاک فوج اور سول انتظامیہ کے 12 ریلیف کیمپ قائم کئے گئے ، ساہیوال میں 49 دیہات متاثر ہوئے، پاک فوج اور سول انتظامیہ کے 30 ریلیف کیمپ قائم ہیں جبکہ تحصیل کبیروالا میں ہیڈ سدھنائی پر اونچے درجے کا سیلاب ہے ، تلمبہ، میاں چنوں اور اقبال نگر میں ریلیف سرگرمیاں جاری ہیں، ہزاروں افراد، مویشی اور گندم محفوظ مقامات پر منتقل کی جا چکی ہے ۔

(جاری ہے)

اوکاڑہ کے متاثرہ علاقوں میں پاک فوج کی جانب سے مفت امداد کے لیے میڈیکل کیمپس بھی قائم کیے گئے ہیں ، رنگ پور اور ہیڈ محمد والا سمیت ممکنہ متاثرہ علاقوں میں بھی فلڈ ریلیف کیمپ قائم کیا گیا ہے، تحصیل مظفرگڑھ اور کوٹ ادو میں پاک فوج اور سول انتظامیہ کی جانب سے حفاظتی اقدامات کا جائزہ لیا گیا، ہیڈ محمد والا پر ممکنہ خطرے سے بروقت بچاؤ کے لیے بریچنگ پوائنٹ اور دیگر حفاظتی اقدامات مکمل کر لیے گئے ہیں۔