وفاقی وزیرمصدق ملک کے الفاظ ہیں کہ چند ہاؤسنگ سوسائٹیز کو بچانے کیلئے لاکھوں لوگوں کو ڈبو دیا

27 اگست ہیڈ لائن تھی کہ پنجاب ڈوب گیا ہے لیکن مریم نواز جاپان میں تھیں، لیکن واپسی پر مریم نواز لاہور کی بجائے سیدھی مری چلی گئیں۔ سابق گورنرمحمد زبیر

ثنااللہ ناگرہ بدھ 3 ستمبر 2025 22:46

وفاقی وزیرمصدق ملک کے الفاظ ہیں کہ چند ہاؤسنگ سوسائٹیز کو بچانے کیلئے ..

لاہور ( اردوپوائنٹ اخبار تازہ ترین۔ آئی پی اے ۔03 ستمبر 2025ء ) سابق گورنرمحمد زبیر نے کہا ہے کہ وفاقی وزیرمصدق ملک کے الفاظ ہیں کہ چند ہاؤسنگ سوسائٹیز کو بچانے کیلئے لاکھوں لوگوں کو ڈبو دیا۔ انہوں نے تحریک تحفظ آئین پاکستان کے رہنماؤں کے ہمراہ نیوزکانفرنس میں کہا کہ یہ میرے الفاظ نہیں ہیں یہ وفاقی وزیر مصدق ملک کے الفاظ ہیں کہ ہم نے چند ہاؤسنگ سوسائٹیوں کو بچانے کے لیے لاکھوں لوگوں کو ڈبو دیا ہے، خواجہ آصف نے کہا سیلاب کا گناہ نہیں ہے کوئی قدرتی آفت نہیں ہے یہ ہماری غلطیوں کی وجہ سے ہو رہا یے۔

محمد زبیر عمر نے کہا کہ 27 اگست ہیڈ لائن تھی کہ پنجاب ڈوب گیا ہے 26 اگست تک مریم نواز جاپان تھیں، میں یہ نہیں کہتا کہ وہ کیوں جاپان گئیں؟ چیف سیکرٹری پنجاب جاپان تھے، سینئیر بیوروکریسی وزرا جاپان تھے، 27 کو مریم نواز نے لاہور کی بجائے اسلام آباد لینڈ کیا اور سیدھی مری چلی گئیں لاہور نہیں آئیں کیونکہ مری میں نظام چلانے کا فیصلہ کرنا تھا اندازہ لگا لیں یہ کتنے سنجیدہ ہیں ۔

(جاری ہے)

دوسری جانب وزیراطلاعات پنجاب عظمی بخاری نے کہا ہے کہ مریم نواز سیلاب متاثرین کے بڑے ریلیف پیکیج کا جلد اعلان کریں گی۔سیلاب متاثرہ بہت بڑا ریسکیوآپریشن کیا گیا ہے، تمام ادارے دن رات کام کر رہے ہیں، گزشتہ کئی سالوں سے کبھی ایسا نہیں ہوا کہ مون سون کا چار ماہ کا سپیل آیا۔نجی ٹی وی سے گفتگو کرتے ہوئے انہوں نے کہا کہ ریلیف کیمپ بند کرنے کے حوالے سے سوشل میڈیا پر جھوٹی خبریں چلائی جارہی ہیں، بچوں کی تعلیمی سرگرمیاں جاری رکھنے کیلئے ریلیف کیمپوں میں ہی سکولز قائم کیے گئے ہیں، وزیراعلی پنجاب سیلاب متاثرین کے بڑے ریلیف پیکیج کا جلد اعلان کریں گی۔

وزیراطلاعات پنجاب نے مریم نواز کے دوروں کے حوالے سے سوال کے جواب میں کہا کہ وزیراعلی کے دوروں کے دوران ایک طرف انتظامیہ پرچیک اینڈ بیلنس رہتا ہے اور دوسری جانب وہ کھانا ،ادویات، جانوروں کے چارے اور ریسکیو سے متعلق ضلع کے کمشنر اور ڈپٹی کمشنرز سے روزانہ کی بنیاد پر رپورٹس لیتی ہیں۔عظمی بخاری نے وزیراعلی کی تصویر کے حوالے سے ایس او پیز کے بارے میں بتایا کہ مریم نواز کی تصویر سے بہت سے مخالفین کو تشویش اور انہیں ڈر لگتا ہے، کیونکہ انہوں نے اپنی محنت سے بہت سے لوگوں کی محبت سمیٹ لی ہے ۔

وزیراطلاعات پنجاب نے کہا کہ فوڈ سکیورٹی کے ممکنہ بحران کے حوالے سے وزیراعلی پنجاب نے کل تین گھنٹے اجلاس کیا جس کیلئے پنجاب حکومت اقدامات کررہی ہے کہ اشیا ئے خورونوش کی قیمتوں میں اضافہ نہ ہوا۔عظمی بخاری نے کہا کہ اینٹی کرپشن نے دریا اور ندی نالوں کی آبی گزرگاہوں میں قائم ہائوسنگ سوسائٹیز کے مالکان کے حوالے سے کارروائیاں شروع کردی گئیں ہیں۔