سعودی عرب لندن میں ڈیفنس اینڈ سیکورٹی ایگزیبیشن میں شرکت کرے گا

جمعرات 4 ستمبر 2025 08:30

ریاض (اُردو پوائنٹ اخبارتازہ ترین - اے پی پی۔ 04 ستمبر2025ء) سعودی عرب کی جنرل اتھارٹی برائے ملٹری انڈسٹری نے لندن میں ڈیفنس اینڈ سکیورٹی ایکوپمنٹس انٹرنیشنل ایگزیبیشن( ڈی ایس ای آئی) میں شرکت کی تیاریوں کو حتمی شکل دے دی۔سعودی خبررساں ایجنسی ’ایس پی اے‘ کے مطابق اتھارٹی کا کہنا ہے عسکری ساز وسامان کے حوالے سے ایگزیبیشن 9 سے 12 ستمبر تک لندن کے اکسیل سینٹر میں ہو گی جس میں سعودی عرب سمیت مختلف ممالک کے عسکری صنعتوں سے وابستہ ادارے شرکت کریں گے۔

(جاری ہے)

سعودی عرب کی جانب سے جنرل اتھارٹی برائے ملٹری انڈسٹری کے علاوہ سرکاری و نجی ادارے بھی اس نمائش میں اپنے سٹالز لگائیں گے جن میں جی اے ڈی ڈی ، سعودی عسکری صنعت کمپنی، سعودی کیمیکل کمپنی، سعودی ایئرکرافٹ مینٹیننس اینڈ انجینئرنگ ورکس کمپنی و دیگر ادارے شامل ہیں۔ ڈیفنس اینڈ سکیورٹی ایکوپمنٹس انٹرنیشنل ایگزیبیشن میں سعودی پویلین کی شرکت فوجی صنعتی صلاحیتوں کو فروغ دینے کی کوششوں کا حصہ ہے جس کا ہدف مملکت کے ویژن 2030 تک آلات اور خدمات کو 50 فیصد سے زیادہ مقامی سطح پر بنانا اورعسکری صنعتی شعبے میں نمایاں ترقی کرنا ہے۔