محمد حارث پرکوچ بھی بھروسہ نہیں کرتا‘باسط علی

محمد حارث بے ہوش کرکٹ کھیل رہے ہیں اور بار بار کی غلطیوں سے سیکھنے میں ناکام رہے ہیں، سابق ٹیسٹ کرکٹر

جمعرات 4 ستمبر 2025 12:37

محمد حارث پرکوچ بھی بھروسہ نہیں کرتا‘باسط علی

کراچی(اُردو پوائنٹ اخبارتازہ ترین - این این آئی۔ 04 ستمبر2025ء)پاکستان کے سابق ٹیسٹ کرکٹر باسط علی کا کہنا ہے کہ محمد حارث پر کوچ بھی بھروسہ نہیں کرتا۔سابق کرکٹر باسط علی نے اپنے یوٹیوب چینل پر کہا کہ سہ ملکی سیریز میں افغانستان سے شکست پر کہا کہ محمد حارث بے ہوش کرکٹ کھیل رہے ہیں اور بار بار کی غلطیوں سے سیکھنے میں ناکام رہے ہیں۔انہوں نے کہا کہ حارث اپنی غلطیوں سے نہیں سیکھ رہے ہیں اور ایک بار پھر غیر ذمہ دارانہ شاٹ کھیلتے ہوئے محمد نبی کی گیند پر آؤٹ ہوگئے۔

باسط علی نے کہا کہ نبی کو خاص طور پر لیفٹ ہینڈر کے بیٹر کو بولنگ کرنے کے لیے لایا گیا تھا لیکن اس کے بجائے آپ آؤٹ ہورہے ہیں اس سے ظاہر ہوتا ہے کہ آپ میں کرکٹ کی کوئی سمجھ نہیں ہے، آپ بے ہودہ کرکٹ کھیل رہے ہیں، صرف ایک چھکا لگانے کے لیے ایک ہیرو کی طرح جھوم رہے ہیں۔

(جاری ہے)

انہوں نے کہا کہ کوچ بھی اب ان پر بھروسہ نہیں کرتا جیسا کہ اس کی مسلسل گرتی ہوئی بیٹنگ پوزیشن سے ظاہر ہوتا ہے۔

سابق کرکٹر نے کہا کہ ہیرو راتوں رات پیدا نہیں ہوتے، وہ محنت سے بنتے ہیں، حارث کو سب کچھ تھالی میں دے دیا گیا، جب پچ مشکل ہوتی ہے تو اوپنرز قدم اٹھاتے ہیں لیکن بنگلادیش کے خلاف کیا ہورہا ہے وہ چھ یا سات پر بیٹنگ کررہا تھا اور یہاں بھی ایسا ہی ہوا۔سابق کرکٹر نے کہا کہ جب کوئی کھلاڑی چھٹے نمبر سے ساتویں نمبر پر چلا جاتا ہے تو یہ واضح ہے کہ کوچ بھی اس پر بھروسہ نہیں کرتا۔واضح رہے کہ سہ ملکی سیریز میں پاکستانی ٹیم اپنا اگلا میچ بدھ کو اسی مقام پر میزبان یو اے ای سے کھیلے گی۔