وزیراعلی پنجاب نے سیلاب متاثرین کی بحالی کیلئے جامع ،فوری پیکیج طلب کر لیا

لاہور(اُردو پوائنٹ اخبارتازہ ترین - این این آئی۔ 05 ستمبر2025ء)وزیراعلی پنجاب مریم نواز شریف نے سیلاب متاثرین کی بحالی کیلئے ایک جامع اور فوری پیکیج طلب کر لیا۔وزیراعلی مریم نواز شریف کی صدارت میں طویل اجلاس ہوا جس میں اربن یونٹ، بورڈ آف ریونیو اور دیگر اہم ڈیپارٹمنٹس کو بحالی پیکیج کیلئے فوری اقدامات کی ہدایت دی گئی۔وزیراعلی مریم نواز شریف نے متاثرین کے مسائل پر ہمدردانہ غور کرنے کا حکم دیتے ہوئے کہا کہ بحالی پیکیج میں امدادی رقوم کو بڑھایا جائے تاکہ متاثرین کی فوری مدد ممکن ہو سکے، انہوں نے سیلاب متاثرہ کاشتکاروں کیلئے ایک خصوصی بحالی پروگرام ترتیب دینے کی بھی ہدایت کی۔

مریم نواز شریف نے بحالی پیکیج کیلئے سروے کا عمل جلد از جلد مکمل کرنے کی ضرورت پر زور دیا اور اس عمل کیلئے شفاف ترین طریقہ کار وضع کرنے کی ہدایت کی جس میں ڈیجیٹل ریکارڈنگ کا بھی اہتمام کیا جائے گا، انہوں نے سروے پراجیکٹ کیلئے ایک اعلی سطح کمیٹی قائم کر دی جو اس عمل کی نگرانی کرے گی۔

(جاری ہے)

وزیراعلی نے اعلان کیا کہ وہ سیلاب متاثرین کی جلد بحالی کیلئے پیکیج کا خود اعلان کریں گی، گھر تباہ ہونے کی وجہ سے فوری طور پر واپس نہ جانے والے خاندانوں کیلئے ہر ضلع میں عارضی مارکی لگائی جائے گی تاکہ وہ سردی کی آمد سے قبل کسی محفوظ جگہ منتقل ہو سکیں، ان مارکیز میں مرد و خواتین کیلئے الگ الگ جگہیں مختص کی جائیں گی اور وہاں صاف پانی، کھانا اور دیگر ضروری سہولتیں فراہم کی جائیں گی۔

مریم نواز شریف نے سیلاب متاثرین کے گھروں کی بحالی کیلئے ’’اپنی چھت، اپنا گھر‘‘پروگرام شامل کرنے کا فیصلہ کیا تاکہ متاثرین کی زندگیوں میں جلد بہتری لائی جا سکے، سیلاب متاثرین کے گھروں کی بحالی تک وہ چین سے نہیں بیٹھیں گی اور ان کیلئے ہر ممکن مدد فراہم کی جائے گی۔اس کے علاوہ مریم نواز شریف نے آبی گزرگاہوں سے تجاوزات اور آبادیاں ختم کرنے کا فیصلہ کیا اور کہا کہ دریاں اور ندی نالوں کی آبی گزرگاہوں کو ریڈ زون قرار دیا جائے گا تاکہ آئندہ کے سیلابوں سے بچا ئوممکن ہو سکے۔

انہوں نے کہا کہ پنجاب میں فلڈ اور دیگر آفات سے بچا کیلئے ایک ماسٹر پلان کی اشد ضرورت ہے تاکہ ہر سال سیلاب کی وجہ سے ہونے والے نقصانات کو کم کیا جا سکے، طویل المدتی اور قلیل المدتی پائیدار پالیسیوں کی ضرورت ہے تاکہ مستقبل میں ایسی آفات سے بچا جا سکے۔مریم نواز شریف نے کہا کہ لوگوں کے گھر اجڑ گئے، ہم سکون سے کیسے بیٹھ سکتے ہیں سیلاب متاثرین کی بہت ساری توقعات مجھ سے وابستہ ہیں، ان توقعات پر پورا اترنا میرا اعزاز اور ذمہ داری ہے، پنجاب حکومت کی طرف سے سیلاب متاثرین کی جلد بحالی کیلئے متعدد اقدامات کئے جائیں گے تاکہ متاثرہ افراد کی زندگیوں میں جلد بہتری آئے۔