m نیکٹا ہیڈکوارٹرز میں عید میلاد النبی ﷺکی پروقار تقریب

امن، رواداری اور اتحاد کا پیغام پیش، نیکٹا کے نیشنل کوآرڈینیٹر جواد احمد ڈوگر کا عملے کو دیانت داری اور عدل کے اوصاف اپنانے کا پیغام

جمعہ 5 ستمبر 2025 20:20

qاسلام آباد(اُردو پوائنٹ اخبارتازہ ترین - آن لائن۔ 05 ستمبر2025ء) نیشنل کاؤنٹر ٹیررازم اتھارٹی (نیکٹا) کے ہیڈکوارٹرز میں عید میلاد النبیﷺ کے پرمسرت موقع پر ایک پروقار تقریب منعقد ہوئی۔ تقریب کے مہمانِ خصوصی نیکٹا کے نیشنل کوآرڈینیٹر جناب جواد احمد ڈوگر تھے۔تقریب کا آغاز تلاوتِ کلام پاک سے ہوا، جس کے بعد نعتِ رسول مقبولﷺ پیش کی گئی۔

بعد ازاں سیرت النبیﷺ پر ایک خصوصی خطاب کیا گیا، جس میں حضور اکرم ﷺ کی حیات طیبہ، تعلیمات اور اعلیٰ اخلاقی اقدار پر روشنی ڈالی گئی۔

(جاری ہے)

مقررین نے خصوصاً امن، رواداری اور اتحاد کے پیغام کو اجاگر کیا۔اپنے اختتامی کلمات میں نیشنل کوآرڈینیٹر نے کہا کہ سیرتِ طیبہ ﷺ کو اپنی ذاتی اور پیشہ ورانہ زندگی کا حصہ بنانا ہم سب کے لیے ضروری ہے۔

انہوں نے عملے پر زور دیا کہ دیانت داری، عاجزی، شفقت اور عدل جیسے اوصاف کو اپنایا جائے، کیونکہ یہی اقدار نیکٹا کے مشن یعنی امن و ہم آہنگی کے فروغ کے لیے بنیادی حیثیت رکھتی ہیں۔اس تقریب میں نیکٹا کے تمام افسران اور ملازمین نے بڑی عقیدت اور احترام کے ساتھ شرکت کی۔ تقریب کا اختتام وطن عزیز پاکستان کی ترقی و خوشحالی کی دعا کے ساتھ ہوا۔