کمشنر بہاولپور ڈویژن کا سیلاب سے متاثرہ علاقوں کا دورہ، فلڈ ریلیف کیمپس میں دستیاب سہولیات کا معائنہ

صادق آباد (اُردو پوائنٹ اخبارتازہ ترین - اے پی پی۔ 06 ستمبر2025ء) کمشنر بہاولپور ڈویژن مسرت جبیں کا تحصیل لیاقت پور اور رحیم یار خان میں سیلاب سے متاثرہ علاقوں کا دورہ، سیلابی صورتحال، فلڈ ریلیف کیمپس میں دستیاب سہولیات کا معائنہ کیا۔انہوں نے سیلاب متاثرین خواتین اور بچوں میں وزیر اعلیٰ پنجاب کی جانب سے تحائف پیش کئے۔ڈپٹی کمشنر خرم پرویز، ایم پی اے چوہدری محمود احمد بھی ہمراہ موجود تھے۔

ڈویژنل کمشنر نے فلڈ ریلیف کیمپ گل محمد لنگاہ، نور والا لیاقت پور، دولت پور رحیم یارخان ا ور فلڈ بچاؤ منچن بند جمعہ واہ کے مقام کا دورہ کرتے ہوئے ریسکیو اینڈ ریلیف سرگرمیوں، دریائے سندھ میں پانی کے بہاؤ کا جائزہ لیا اور ریلیف کیمپس میں مقیم خاندانوں سے گفتگو کرتے ہوئے کہا کہ حکومت پنجاب سیلاب متاثرین کی جان و مال کے تحفظ کیلئے دن رات کوشاں ہے۔

(جاری ہے)

وزیر اعلیٰ پنجاب کے ویژن کے تحت ڈویژن بہاولپور میں فلڈ ریسکیو اینڈ ریلیف آپریشن جاری ہے حکومت پنجاب کو تاریخ کی ایک بڑی قدرتی آفت کا سامنا ہے اور وزیر اعلیٰ مریم نواز کی قیادت میں صوبہ میں تاریخ کی سب سے بڑی ریسکیو اینڈ ریلیف سرگرمیاں جاری ہے اور سیلاب متاثرین کی مکمل بحالی تک انہیں مکمل تحفظ اور تعاون فراہم کیا جائے گا۔۔انہوں نے کہا کہ سیلاب متاثرین حکومت پنجاب کے مہمان ہیں فلڈ ریلیف کیمپس میں متاثرین سیلاب کی رہائش، خوراک، پانی، علاج معالجہ کی معیاری سہولیات کی فراہمی کو بروقت یقینی بنایا جا رہا ہے۔

علاوہ ازیں تمام ریلیف کیمپس میں نوزائیدہ اور چھوٹے بچوں کی دیکھ بھال کے لئے چائلڈ اسپیشلسٹ جبکہ خواتین کے لئے لیڈی ڈاکٹرز روزانہ وزٹ کر رہے ہیں۔متاثرین کے مال مویشیوں کی دیکھ بھال، حفاظت اور خوراک کی ذمہ داری بھی حکومت پنجاب نے اپنے ذمہ لی ہوئی ہے جسے بخوبی احسن انجام دیا جا رہا ہے۔انہوں نے کہا کہ مصیبت اور آفت کی اس گھڑی میں سیلاب متاثرین کو تنہا نہیں چھوڑیں گے۔

کمشنر بہاولپور ڈویژن مسرت جبیں نے افسران سے خطاب کرتے ہوئے کہا کہ دریائے سندھ میں ہائی فلڈ کا خطرہ ہے تمام ادارے الرٹ رہیں گے۔انہوں نے کہا کہ آج شام تک پنجند ہیڈ ورکس پر سیلابی پانی کا بہاؤ پانچ لاکھ کیوسک سے بڑھ جائے گا۔ ہیڈ پنجند میں پانی کی آمد اور اخراج کی کڑی مانیٹرنگ جاری ہے۔ ایم پی اے چوہدری محمود احمد نے کہا کہ وزیر اعلیٰ پنجاب کی ہدایت پر عوامی نمائندگان بھی سیلاب متاثرہ علاقوں میں موجود رہتے ہوئے امدادی سرگرمیاں سر انجام دے رہے ہیں۔

انہوں نے کہا کہ وزیر اعلیٰ مریم نواز شریف کی قیادت میں حکومت اور اداروں کے بروقت فیصلوں اور مثالی عملدرآمد کے باعث بڑے نقصان سے محفوظ رہنے میں مدد ملی ہے۔ڈپٹی کمشنر خرم پرویز نے بریفنگ دیتے ہوئے بتایا کہ دریائے سندھ میں ساڑھے چار لاکھ کیوسک کا سیلابی ریلا شام تک ساڑھے پانچ لاکھ کیوسک سے تجاوز کر جائے گا۔موجودہ سیلاب نے ضلع کے 43موضعات کو متاثر کیااور ضلع کے 52ہزار257متاثرین کو محفوظ مقام یا فلڈ ریلیف کیمپس میں منتقل کیا گیا جبکہ 49ہزار 147مویشیوں کو بھی محفوظ مقام پر منتقل کیا گیا ہے۔

انہوں نے کہا کہ ضلعی انتظامیہ مکمل الرٹ اور تمام امدادی ادارے حساس مقامات پر فرائض سر انجام دے رہے ہیں۔وزیر اعلیٰ پنجاب کی ہدایت پر سیلاب سے متاثرہ نشیبی علاقوں میں علاج معالجہ کی سہولت فراہم کرنے کے لئے کلینک آن بوٹس (کشتی پر ہسپتال) بھی فعال کر دیا گیا ہے۔اس موقع پر متعلقہ تحصیلوں کے اسسٹنٹ کمشنرز عبدالحنان خان، محمد ابراہیم میلادی کھر نے بھی ریسکیو و دیگر حکام کے ہمراہ بریفنگ دی۔