کچہ میں پولیس کو مزید جدید آلات و اسلحہ سے لیس کیا جا رہا ہے،ڈاکوؤں کے مذموم عزائم کو ہر صورت ناکام بنائیں گے،ایٖڈیشنل آئی جی ساؤتھ پنجاب

ہفتہ 6 ستمبر 2025 01:30

صادق آباد (اُردو پوائنٹ اخبارتازہ ترین - اے پی پی۔ 06 ستمبر2025ء) ایٖڈیشنل آئی جی ساؤتھ پنجاب کامران خان نے کہا ہے کہ کچہ میں پولیس کو مزید جدید آلات و اسلحہ سے لیس کیا جا رہا ہے ڈاکوؤں کے مذموم عزائم کو ہر صورت ناکام بنائیں گے، مغوی افراد کی بحفاظت بازیابی کے لیے تمام تر وسائل اور قوتیں بروئے کار لائی جارہی ہیں، کچہ میں تعینات فورس کے بلند مورال سے خوشی ہوئی فرنٹ لائن ہیروز پولیس فورس کے عظیم سپوت ہیں۔

(جاری ہے)

ان خیالات کا اظہار انہوں نے ریجنل پولیس آفیسر بہاولپور رائے بابر سعید اور ڈی پی او عرفان علی سموں کے ہمراہ کچہ کے دورہ کے دوران گفتگو کرتے ہوئے کیا، انہوں نے کہا کہ کچہ کے ڈاکو معاشرہ کے ناسور ہیں جو کہ معصوم لوگوں کو تاوان جیسے مکروہ دھندھے کے لیے اغواء کرتے ہیں اور اب پبلک ٹرانسپورٹ پر حملہ کر کے دہشت گرد ہونے کا ثبوت د یا،انہیں کیفر کردار تک پہنچانے کے لیے کچہ میں پولیس کو مزید جدید آلات و اسلحہ سے لیس کیا جارہا ہے جس سے ڈاکوؤں کے خلاف آئندہ انٹیلی جنس بیسڈ مزید موئثر اور پوری قوت کے ساتھ کیے جائیں گے اور ان کے مذموم مقاصد کو ہر صورت ناکام بنایا جائے گا، انہوں نے کہا کہ مغوی افراد کی بازیابی کے لیے ہر ممکن کوششیں بروئے کار لائی جا رہی ہیں جنہیں کامیابی سے ہمکنار کرنے کے لیے تمام تر وسائل اور قوتیں کام میں لائیں گے، انہوں نے اس موقع پر کچہ میں تعینات پولیس افسران و جوانوں سے ملاقات کرتے ہوئے کہا کہ ان کے بلند مورال سے انہیں خوشی محسوس ہوئی ہے یہ پنجاب پولیس کے فرنٹ لائن ہیرو اور محکمہ پولیس کے عظیم سپوت ہیں، انہوں نے اس موقع پر آر پی او رائے بابر سعید اور ڈی پی او عرفان علی سموں سے انٹیلی جنس بیسڈ آپرینشز، موجودہ و آئندہ کے لائحہ عمل پر تفصلی تبادلہ خیال کرتے ہوئے احکامات و ہدایات جاری کیں۔