عرب ممالک کی خودمختاری کو لاحق کسی بھی خطرے کو برداشت نہیں کیا جائے گا، عرب لیگ

ہفتہ 6 ستمبر 2025 08:20

قاہرہ (اُردو پوائنٹ اخبارتازہ ترین - اے پی پی۔ 06 ستمبر2025ء) عرب لیگ کے وزرائے خارجہ کونسل نے اپنے 164 ویں اجلاس کے اختتام پرجاری اعلامیہ میں واضح کیا ہے کہ عرب ممالک کی خودمختاری اور سالمیت کو لاحق کسی بھی خطرے کو برداشت نہیں کیا جائے گا۔ایس پی اے کے مطابق اسرائیلی قبضے کے خاتمے کے بغیرخطے میں پائیدار امن و استحکام ممکن نہیں۔قاہرہ میں ہونے والے عرب لیگ کے وزرائے خارجہ کونسل کے اجلاس کے بعد جاری ہونے والے اعلامیے میں مزید کہا گیا ہے کہ ’عرب لیگ مسئلہ فلسطین کے منصفانہ اور جامع حل کی بھرپور حمایت کرتی ہے۔

اعلامیہ میں دوریاستی حل ، سال 2002 کا عرب امن منصوبہ اور اقوام متحدہ کی قرار دادوں پر عمل درآمد کو خطے کے لیے انتہائی ضروری قرار دیا گیا۔کونسل نے اسرائیل کی توسیع پسندانہ پالیسیوں پر بھی سخت تشویش کا اظہار کیا جن میں غیرقانونی بستیوں کی تعمیر ، فلسطینیوں کی جبری بے دخلی ، آبادیاتی ڈھانچے میں تبدیلی غزہ اور فلسطین کے دیگر علاقوں کا محاصرہ وغیرہ شامل تھے۔

(جاری ہے)

کونسل نے ان اقدامات کو عالمی قوانین اور انسانی ضوابط کی صریح خلاف ورزی قرار دیا۔اعلامیے میں خبردار کیا گیا کہ اسرائیل کی مسلسل جارحیت اور مسئلہ فلسطین کے حل میں رکاوٹ نہ صرف خطے کے امن کے لیے بڑا خطرہ ہے بلکہ اس سے انتہا پسندی ، نفرت اور تشدد میں بھی اضافہ ہونے کا اندیشہ ہےجس کے اثرات عالمی سطح پر بھی پڑرہے ہیں۔کونسل نے عالمی برادری سے مطالبہ کیا کہ وہ اپنی ذمہ داریاں پوری کرے ، فلسطینی عوام کے حق میں عملی اقدامات کرے اور اسرائیل کو جارحانہ پالیسیوں سے باز رکھنے میں اپنا بھرپور کردار ادا کرے۔ اعلامیے می ںاس بات پر زوردیا گیا کہ کسی بھی ایسی کوشش کو قبول نہیں کیا جائے گا جو خطے کے استحکام ، ترقی اور سلامتی کے لیے نقصان دہ ہو۔