سیلاب متاثرہ علاقوں میں بجلی کی بحالی کا کام تیزی سے جاری، پیسکو

اسلام آباد (اُردو پوائنٹ اخبارتازہ ترین - اے پی پی۔ 06 ستمبر2025ء) سیلاب متاثرہ علاقوں میں بجلی کی بحالی کا کام تیزی سے جاری ہے اور اکثر علاقوں میں بجلی کی بحالی کا کام مکمل کرلیا گیا ہے۔پاور ڈویژن کی جانب سے6 ستمبر تک مختلف متاثرہ علاقوں میں بجلی کی بحالی کی جاری رپورٹ کے مطابق پیسکو کے علاقے سوات، بنر، شانگلہ، صوابی اور ڈی آئی خان کے 12 گرڈز اور 91 فیڈرز متاثر ہوئے، پیسکو کے 86 فیڈرز مکمل اور 5 جزوی طور پر بحال کر دیئے گئے۔

رپورٹ پاور ڈویژن کے مطابق پیسکو کے 463375 متاثرہ صارفین میں سے 461049 صارفین کیلئے بجلی بحال کر دی گئی،پیسکو کے باقی 2326 متاثرہ صارفین کیلئے بجلی کی بحالی کا کام 11 سے 12 ستمبر تک مکمل کرنے کی توقع ہے،پیسکو کے زیرِ انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔

(جاری ہے)

گیپکوکے کے 11 گرڈز اور 103 متاثرہ فیڈرز میں سے 86 فیڈرز مکمل اور 17 جزوی طور پر بحال کر دیئے گئے۔

رپورٹ پاور ڈویژن کے مطابق گیپکو کے 735987 متاثرہ صارفین میں سے 711261 صارفین کیلئے بجلی بحال کر دی گئی،گیپکو کے باقی 24726 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا،لیسکو میں لاہور، اوکاڑہ، شيخوپورہ، قصور اور ننکانہ کے 67 متاثرہ فیڈرز میں سے 56 مکمل اور 11 جزوی طور پر بحال کر دیئے گئے ،لیسکو کے 73734 متاثرہ صارفین میں سے 61083 صارفین کیلئے بجلی بحال کر دی گئی۔

لیسکو کے باقی 12651 متاثرہ صارفین کیلئے بجلی کی بحالی کا کام 7 سے 8 ستمبر تک مکمل کرنے کی توقع ہے،لیسکو کے زیرِ انتظام علاقے شیخوپورہ میں بجلی کی بحالی کا کام مکمل ہوگیا۔رپورٹ کے مطابق فیسکو کے زیرِ انتظام علاقوں ٹی ٹی سنگھ، فیصل آباد ، چنیوٹ، جھنگ، سرگودھا، میانوالی اور ڈی آئی خان کے 27 گرڈ اور 80 فیڈرز متاثر ہوئے،فیسکو کے متاثرہ فیڈرز میں سے 11 مکمل اور 62 عارضی طور پر بحال کر دیئے گئے،فیسکو کے 199955 متاثرہ صارفین میں سے 71496 صارفین کیلئے بجلی بحال کر دی گئی۔

فیسکو کے باقی 128459 متاثرہ صارفین کیلئے بجلی کی بحالی کا کام پانی اترنے پر 8 ستمبر تک مکمل کرنے کی توقع ہے،میپکو کے زیرِ انتظام علاقوں کے 149 متاثرہ فیڈرز عارضی طور پر بحال کر دیئے گئے۔رپورٹ کے مطابق میپکو کے زیرِ انتظام علاقوں میں 110354 صارفین متاثر ہوئے،میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔

ٹیسکو کے علاقے شمالی وزیرستان اور خیبر کے 18 فیڈرز متاثر ہوئے،ٹیسکو کے 3 فیڈر مکمل اور 11 فیڈر عارضی طور پر بحال کر دیئے گئے۔رپورٹ کے مطابق ٹیسکو کے 31774 متاثرہ صارفین میں سے 8179 صارفین کیلئے بجلی بحال کر دی گئی۔ٹیسکو کے باقی 23595 متاثرہ صارفین کیلئے بجلی کی بحالی کا کام تقریباََ 15 ستمبر شام 5 بجے تک مکمل ہونے کی توقع ہے۔ رپورٹ کے مطابق ہیزیکو کے زیرِ انتظام علاقے مانسہرہ کے 3 متاثرہ فیڈر مکمل طور پر بحال کر دیئے۔ مجموعی طور پر 50 گرڈ اور 511 متاثرہ فیڈرز میں 245 کو مکمل اور 255 کو عارضی طور پر بحال کر دیا گیا ہے۔پاور ڈویژن نے بتایا کہ یوں 1638844 متاثرہ صارفین میں سے 1344071 صارفین کیلئے بجلی بحال کر دی گئی،باقی 294773 متاثرہ صارفین کیلئے بجلی کی بحالی ترجیح ہے۔