Live Updates

(ن ) لیگ وپیپلزپارٹی اس مشکل گھڑی میں عوام کی فلاح وبہبود کیلئے ایک پیج پر ہیں، سردار سلیم حیدر

اتوار 7 ستمبر 2025 14:50

لاہور (اُردو پوائنٹ اخبارتازہ ترین - اے پی پی۔ 07 ستمبر2025ء) گورنرپنجاب سردار سلیم حیدر خان نے کہا ہے کہ مسلم لیگ(ن )اور پیپلزپارٹی سیلاب کی اس مشکل گھڑی میں عوام کی فلاح وبہبود کیلئے ایک پیج پر ہیں،گورنر ہائوس کے دروازے تمام سیاسی جماعتوں کے رہنمائوں کیلئے کھلے ہیں۔ان خیالات کا اظہار انہوں نے اتوار کے روز صوبائی وزیر کھیل و لیبر ملک فیصل ایوب کھوکھر اور رکن قومی اسمبلی و صدر مسلم لیگ ن لاہور سیف المولک کھوکھر سے یہاں گورنر ہائوس میں ملاقات کے دوران گفتگو کرتے ہو ئے کیا ۔

گورنرپنجاب نے کہا کہ موجودہ سیلابی صورتحال میں سیاسی جماعتیں عوامی خدمت کرتی نظر آتی ہیں،مسلم لیگ (ن )اور پیپلزپارٹی سیلاب کی اس مشکل گھڑی میں عوام کی فلاح وبہبود کیلئے ایک پیج پر ہیں۔

(جاری ہے)

انہوں نے کہا کہ ن لیگ اور پیپلزپارٹی دو مختلف جماعتیں ہیں مگر ملکی سالمیت کی خاطر سیاسی جماعتیں نہیں بلکہ ایک قوم ہیں، فیصل ایوب کھوکھر ایک نوجوان صوبائی وزیر کھیل جو پڑھے لکھے نوجوانوں کیلئے ایک مثال ہیں۔

سردار سلیم حیدر خان نے کہا کہ ایک سیاسی جماعت نے نوجوانوں کو سیاست کی آڑ میں ملکی اداروں کے خلاف نفرت کے بیج بوئے ،اپنے آپ کو سیاسی جماعت کہلانے والے سیلاب میں عوام کی خدمت کرتے نظر نہیں آئے،سیلاب کے دوران یہ سیاسی جماعت اس مشکل گھڑی میں کہیں بھی عوام کی خدمت کرتے نظر نہیں آئی۔ گورنر نے مزید کہا کہ فیلڈ مارشل سید عاصم منیر نے پوری دنیا میں اپنی صلاحیتوں کا لوہا منوایا ہے ،پاکستان کے اندرونی و بیرونی دشمنوں کیلئے فیلڈ مارشل عاصم منیر خوف کی علامت ہیں۔