پنجاب فوڈ اتھارٹی مری کی ٹیموں کی شہر کے داخلی راستوں پر ناکے، دودھ بردار گاڑیوں کی چیکنگ

اتوار 7 ستمبر 2025 17:30

راولپنڈی (اُردو پوائنٹ اخبارتازہ ترین - اے پی پی۔ 07 ستمبر2025ء) پنجاب فوڈ اتھارٹی مری کی ٹیموں نے شہر کے داخلی راستوں پر ناکے لگا کر دودھ بردار گاڑیوں کی چیکنگ کی۔ کارروائی کے دوران 700 لیٹر پانی ملا ملاوٹی دودھ موقع پر تلف کر دیا گیا۔

(جاری ہے)

حکام فوڈ اتھارٹی مری کے مطابق 20 دودھ بردار گاڑیوں کی جانچ پڑتال کی گئی جن میں سے 4 گاڑیوں پر ناقص دودھ سپلائی کرنے پر 45 ہزار روپے جرمانہ عائد کیا گیا۔

حکام کا کہنا ہے کہ شہریوں اور سیاحوں کو معیاری خوراک کی فراہمی اولین ترجیح ہے۔ مضر صحت اور غیر معیاری کھانے پینے کی اشیاء فروخت کرنے کی ہرگز اجازت نہیں دی جائے گی۔ دودھ بردار گاڑیوں کو روزانہ ناکے لگا کر چیک کیا جاتا ہے جبکہ شہری اور سیاح کسی بھی شکایت کی صورت میں ہیلپ لائن 1223 پر رابطہ کر سکتے ہیں۔