پاک بحریہ کی تاریخ بہادری کی داستانوں سے بھرپور ہے ، معرکہ حق میں پاک بحریہ نے بڑی کامیابی سے اپنی تیاری اور عزم کا عملی ثبوت دیا، وزیر اعظم شہباز شریف کا یوم بحریہ پر پیغام

اسلام آباد (اُردو پوائنٹ اخبارتازہ ترین - اے پی پی۔ 07 ستمبر2025ء) وزیر اعظم محمد شہباز شریف نے کہا ہے کہ معرکہ حق میں پاک بحریہ نے اپنی روشن تاریخ کے عین مطابق بڑی کامیابی سے اپنی تیاری اور عزم کا عملی ثبوت دیا۔ کامیاب دفاع نے یہ واضح پیغام دیا کہ پاکستان اپنی آبی سرحدوں کی حفاظت اور سالمیت کا ہر قیمت پرتحفظ کرنا جانتا ہے، آج یوم بحریہ پر میں پاک بحریہ سے وابستہ تمام جوانوں، افسران اور اہلکاروں کو خراج تحسین پیش کرتا ہوں جن کے عزم و حوصلے اور پیشہ ورارانہ فرائض کی ادائیگی نے ہمیشہ قوم کا سر فخر سے بلند کیا ہے۔

وزیراعظم آفس کے میڈیا ونگ کے مطابق وزیر اعظم شہباز شریف نے یوم بحریہ کے موقع پر اپنے پیغام میں کہا کہ آج کا دن پاک بحریہ کی تابناک تاریخ اور افسران کو خراج تحسین پیش کرنے کے ساتھ ملک کی آبی سرحدوں اور آبی مفادات کے تحفظ کا اعادہ کرنے کا موقع بھی فراہم کرتا ہے۔

(جاری ہے)

وزیر اعظم نے کہا کہ پاک بحریہ کی تاریخ بہادری کی داستانوں سے بھرپور ہے جس میں 1965 کی جنگ میں آپریشن سومنات ایک یادگار حیثیت رکھتا ہے۔

وزیر اعظم نے کہا کہ اس آپریشن میں پاک بحریہ نے بھارتی ساحلی شہر دوارکا پر فیصلہ کن حملہ کرتے ہوئے مواصلاتی نظام کو تباہ کیا تھا۔ یہ آپریشن پاک بحریہ کی نہ صرف بہادری اور عملی صلاحیتوں کا مظاہرہ تھا بلکہ اس نےملکی آبی سالمیت اور خود مختاری کی غیر متزلزل تحفظ کے عزم کی بھی بنیاد رکھی۔ وزیر اعظم نے کہا کہ اس تاریخی معرکے کی فتح آج بھی بحری افواج کے جوانوں کے دفاع وطن کے جذبہ کو تازہ کرتی ہے اور یاد دہانی کراتی ہے کہ پاکستان کی آبی سرحدوں کی حفاظت پاک بحریہ کی مستعد نگرانی میں ہے۔

1965 کی جنگ کے بعد بھی بحیرہ عرب میں طاقت کے توازن کو قائم رکھنے میں پاک بحریہ کا کلیدی کردار اسکی پیشہ ورانہ صلاحیت اور حکمت عملی کا منہ بولتا ثبوت ہے۔ وزیر اعظم شہباز شریف نے کہا کہ حالیہ معرکہ حق میں پاک بحریہ نے اپنی روشن تاریخ کے عین مطابق بڑی کامیابی سے اپنی تیاری اور عزم کا عملی ثبوت دیا۔ کامیاب دفاع نے یہ واضح پیغام دیا کہ پاکستان اپنی آبی سرحدوں کی حفاظت اور سالمیت کا ہر قیمت پرتحفظ کرنا جانتا ہے۔

انہوں نے کہا کہ پاک بحریہ جنگی محاذ کے علاوہ پاکستان کے آبی شعبہ کی مضبوطی میں بھی کلیدی کردار ادا کر رہی ہے۔ آبی معیشت، بندرگاہوں کی تعمیر و ترقی اور آبی کمیونٹی کی فلاح و بہبود اور معاشی پہلوؤں میں پاک بحریہ اپنا بھرپور کردار ادا کر رہی ہے۔ وزیر اعظم نے کہا کہ فخر سے کہا جا سکتا ہے کہ پاک بحریہ ملک کی محافظ اور ہمارے تابناک مستقبل کی معمار ہے۔

آبی گزرگاہوں میں ذرائع مواصلات کے تحفظ، آفات میں انسانی امداد اور بین الاقوامی مشترکہ مشقوں میں بحریہ کے کردار نے دنیا کے ممالک میں پاکستان کی عزت و وقار میں اضافہ کیا ہے۔ انہوں نے کہا کہ آبی شعبہ کےفوائد کو اجاگر کرنے اور شعبہ جاتی اقدامات سے پاک بحریہ نے ترقی و خوشحالی کی نئی جہتوں کو متعارف کرایا ہے۔یوم بحریہ پر ہم پاک بحریہ کےماضی اور موجودہ ہیروز کو سلام پیش کرتے ہیں۔ اللہ تعالی پاک بحریہ ،مسلح افواج اور ہمارے ملک کو ترقی و خوشحالی اور کامیابی سے ہمکنار کریں، آمین!، پاک بحریہ زندہ باد! پاکستان پائندہ باد!