متحدہ عرب امارات اور اردن نے فلسطینیوں کی جبری بے دخلی اور اسرائیلی آبادکاری کو مسترد کردیا

پیر 8 ستمبر 2025 10:30

ابو ظہبی،عمان (اُردو پوائنٹ اخبارتازہ ترین - اے پی پی۔ 08 ستمبر2025ء) متحدہ عرب امارات کے صدر شیخ محمد بن زاید اور اردن کے شاہ عبداللہ دوم نے واضح کیا ہے کہ ان کے ممالک فلسطینی علاقوں کے کسی بھی حصے کو ضم کرنے، فلسطینیوں کو ان کے گھروں سے بے دخل کرنے یا آبادکاری کی توسیع کے اسرائیلی منصوبوں کے خلاف ہیں۔ العربیہ اردو کے مطابق انہوں نے کہا کہ ایسی کارروائیاں ’’دو ریاستی حل‘‘ کو نقصان پہنچاتی ہیں، خطے میں امن و استحکام کو خطرے میں ڈالتی ہیں اور امن کے امکانات کو متاثر کرتی ہیں۔

(جاری ہے)

اسی تناظر میں دونوں رہنماؤں نے اسرائیل کے ان بیانات اور اقدامات کو بھی مسترد کر دیا جو خطے کی خودمختاری کے لئے خطرہ ہیں۔ انہوں نے بھائی چارے کے ساتھ مشاورت اور مشترکہ رابطے جاری رکھنے کی اہمیت پر زور دیا۔ یہ موقف اردن کے فرمانروا شاہ عبداللہ دوم کے دورہ امارات کی حالیہ دورے کے دوران سامنے آیا، جہاں انہوں نے امارات کے صدر شیخ محمد بن زاید سے ملاقات کی۔ابوظہبی کے الشاطی محل میں ہونے والی اہم ملاقات کے موقع پر دونوں رہنماؤں نے خطے اور عالمی سطح کے اہم امور پر بات چیت کی اور خصوصاً فلسطینی علاقوں میں نئی پیش رفت پر تبادلہ خیال کیا۔