فرانسیسی حکومت گرگئی، وزیراعظم پارلیمنٹ سے اعتماد کا ووٹ لینے میں ناکام

منگل 9 ستمبر 2025 13:24

پیرس(اُردو پوائنٹ اخبارتازہ ترین - این این آئی۔ 09 ستمبر2025ء) فرانسیسی وزیراعظم فرانسوا بائرو پارلیمنٹ سے اعتماد کا ووٹ لینے میں ناکام ہوگئے۔غیر ملکی میڈیا کے مطابق یہ فرانس کی جمہوری تاریخ میں تیسری بار ہیکہ پارلیمنٹ کے عدم اعتماد سے حکومت کا خاتمہ ہوگیا۔فرانس کے وزیر اعظم 364 ارکان پارلیمنٹ کے مقابلے میں صرف 194 ارکان کا ووٹ حاصل کرسکے۔

وزیراعظم بائرو نے مالی بحران کے حل کے لیے اعتمادکا ووٹ حاصل کرنے کی قرار داد خود پیش کی تھی تاہم وہ پارلیمنٹ کا اعتماد حاصل کرنے میں ناکام رہے۔ ملک میں جاری مالی بحران حل کرنے میں ناکامی، عوامی تعطیلات ختم کرنا اور فلاحی اخراجات میں کمی کرنا وزیراعظم بائرو کے خلاف عدم اعتماد کا سبب بنیں، انہوں نے دسمبر 2024 میں عہدہ سنبھالا تھا۔

(جاری ہے)

حکومت ختم ہونے پر اپوزیشن رہنما میریں لی پین نے ملک میں نئے انتخابات کا مطالبہ کر دیا ۔سیاسی صورتحال نے یورپی یونین کی دوسری بڑی معیشت کو سیاسی بحران میں دھکیل دیا ہے اور صدر میکرون کے سیاسی مستقبل پر بھی سوالیہ نشان لگا دیا ہے۔فرانسیسی صدر میکرون کو اب نئے وزیراعظم کی تقرری کرنا ہوگی یا نئے الیکشن کروا کربحران کا حل تلاش کرنا ہوگا تاکہ 2026 کا بجٹ منظور ہو سکے۔گزشتہ 2 سالوں میں 4 وزرائے اعظم آچکے ہیں اور اب پانچواں وزیراعظم بھی شاید اس سیاسی تعطل کو ختم نہ کرسکے۔فرانس کی پارلیمنٹ میں واضح اکثریت نہ ہونے کی وجہ سے گزشتہ حکومتوں کو قانون سازی میں شدید مشکلات کا سامنا رہا ہے۔