ایف پی سی سی آئی کیپٹل آفس میں سیلاب متاثرین کیلئے فنڈ ریزنگ تقریب

اسلام آباد (اُردو پوائنٹ اخبارتازہ ترین - اے پی پی۔ 08 ستمبر2025ء) فیڈریشن آف پاکستان کامرس اینڈ انڈسٹری (ایف پی سی سی آئی )کیپٹل آفس میں سیلاب متاثرین کیلئے فنڈ ریزنگ تقریب کا انعقاد کیا جس میں ایف پی سی سی آئی کے صدر عاطف اکرام شیخ ، معروف اینکر پرسن سلیم صافی اور قومی ہیرو و سابق کرکٹر شاہد خان آفریدی اور دیگر افراد نے شرکت کی۔ ایف پی سی سی آئی کی طرف سےجاری بیان کے مطابق ایف پی سی سی آئی کے صدر نے تقریب سے خطاب کرتے ہوئے کہا کہ فیڈریشن فلڈ ریلیف فنڈ کے تحت متاثرین سیلاب کیلئے امدادی سامان شاہد آفریدی فائونڈیشن کے حوالے کیا جائے گا، قومی ہیرو شاہد خان آفریدی کرکٹ کی تاریخ کے سب سے بڑے آل راؤنڈرز میں شمار ہوتے ہیں،لالہ کی خدمات صرف کرکٹ کے میدانوں تک محدود نہیں، بلکہ آپ انسانیت کی خدمت میں بھی پیش پیش ہیں۔

(جاری ہے)

انہوں نے کہا کہ شاہد آفریدی فاؤنڈیشن نے خود کو پاکستان کی ایک نمایاں چیریٹی فاؤنڈیشن کے طور پر منوایا ہے، شاہد آفریدی فاؤنڈیشن پورے پاکستان میں لاکھوں لوگوں کے لیے روشنی کی کرن ہے، صرف پنجاب میں حالیہ سیلاب کے نتیجے میں 42 لاکھ سے زائد لوگ متاثر ہوئے ہیں۔عاطف اکرام شیخ نے کہا کہ سب دوستوں سے اپیل ہے کہ سیلاب متاثرین کی مدد کے نوبل کاز میں بڑھ چڑھ کر شامل ہوں۔

اس موقع پر خطاب کرتے ہوئے سینئر صحافی واینکر پرسن سلیم صافی نےکہا کہ شاہد خان آفریدی بہت اچھا کام کر رہے ہیں، شاہد آفریدی سکون سے عیش و آرام کی زندگی بسر کر سکتے تھےلیکن وہ اپنی عوام کیلئے سب کچھ چھوڑ چھاڑ کر کام میں لگے ہوئے ہیں۔ انہوں نے کہا کہ ہمارا بھی فرض ہے کہ جتنا ہو سکے شاہد آفریدی فائونڈیشن کی مدد کریں۔تقریب سے خطاب کرتے ہوئے قومی ہیرو سابق کرکٹر شاہد آفریدی نے کہا کہ پاکستان نے مجھے بہت کچھ دیا ہے، اب لوٹانے کا وقت ہے، سب سے زیادہ سکون لوگوں کی خدمت اور چیرٹی کے کاموں میں ہے، بونیر میں ایک شخص نے اپنے خاندان کے 14 افراد کو کھویا۔

انہوں نے کہا کہ سب لوگ جائیں اور ان لوگوں سے ملیں، آج جس کمیونٹی کے درمیان موجود ہوں یہ اصل کام کرنے والے لوگ ہیں، بونیر اور دیر میں سیلاب سے بہت نقصانات ہوئے، کوشش ہے انہیں گھر بنا کر دیں۔ انہوں نے کہا کہ متاثرہ لوگوں کو ایسی جگہ گھر بنا کر دینے ہیں کہ دوبارہ وہ سیلاب سے متاثر نہ ہوں،یہاں سے پنجاب کے سیلاب متاثرہ علاقوں میں جائوں گا، بزنس کمیونٹی ہمارے ملک کی طاقت ہے، مل کر کام کرینگے۔

فائونڈیشن کے سی ای او ظفرملک نے کہا کہ شاہد آفریدی فائونڈیشن پسماندہ علاقوں میں صحت اور صاف پانی کے منصوبوں پر کام کر رہی ہے، گوادر سے لے کر کوئٹہ تک 700 میل کے علاقے میں کوئی ہسپتال نہیں ہے۔ انہوں نے کہا کہ شاہد خان آفریدی فائونڈیشن نے خوشاب میں پینے کے صاف پانی کی فراہمی کا منصوبہ مکمل کیا ہے، شاہد آفریدی تشہیر کی بجائے شفافیت پر یقین رکھتے ہیں۔ انہوں نے کہا کہ بزنس کمیونٹی کے ساتھ مل کر کام کرنا چاہتے ہیں۔