Live Updates

کمشنر فیصل آباد ڈویژن کا سیلابی علاقوں کا دورہ، انتظامات کا جائزہ

پیر 8 ستمبر 2025 18:20

چنیوٹ (اُردو پوائنٹ اخبارتازہ ترین - اے پی پی۔ 08 ستمبر2025ء) وزیراعلیٰ پنجاب مریم نواز شریف کی ہدایات پر ڈویژنل و ضلعی انتظامیہ سیلاب متاثرین کی بحالی اور امداد کے لئے تمام دستیاب وسائل بروئے کار لا رہی ہے۔ اسی سلسلے میں کمشنر فیصل آباد راجہ جہانگیر انور نے ضلع چنیوٹ کا دورہ کیا، ان کے ہمراہ ڈپٹی کمشنر صفی اللہ گوندل بھی موجود تھے۔کمشنر فیصل آباد نے موضع رشیدہ جھنگ روڈ، متھرو مہ، اڈا پٹھان کوٹ اور جامعہ آباد میں قائم فلڈ ریلیف کیمپس کا معائنہ کیا۔

انہوں نے وہاں مقیم متاثرہ خاندانوں سے ملاقات کی اور تین وقت کا کھانا، ادویات، علاج معالجہ اور دیگر بنیادی سہولیات کی فراہمی کے حوالے سے دریافت کیا۔ہیلتھ کیمپس میں ادویات کی دستیابی، جبکہ مین روڈ پر محکمہ زراعت اور لائیو اسٹاک کے اسٹالز پر مویشیوں کے چارے کی فراہمی کا بھی جائزہ لیا۔

(جاری ہے)

کمشنر نے موقع پر موجود کسانوں سے بات چیت کی اور ان کی ضروریات کے بارے میں معلومات حاصل کیں۔

بعد ازاں موضع لودھرا نوشہرہ کا بھی دورہ کیا گیا جہاں ہائی ویز کی جانب سے سیلاب سے متاثرہ سڑکوں کی بحالی کے جاری کاموں کا معائنہ کیا گیا۔اس موقع پر کمشنر فیصل آباد راجہ جہانگیر انور نے کہا کہ سیلاب متاثرین کی مکمل بحالی ایک بڑا چیلنج ضرور ہے تاہم حکومت اور انتظامیہ اس مقصد کے لئے پرعزم ہیں۔ متاثرین کو فلڈ ریلیف کیمپس میں ہر ممکن سہولیات فراہم کی جا رہی ہیں اور ان کی آبادکاری کے لئے سرتوڑ کوششیں جاری ہیے۔