پنجاب اسمبلی میں سینیٹ کی نشست پر ضمنی الیکشن (کل )ہوگا

اپوزیشن کا ووٹ کاسٹ نہ کرنے کا اعلان ،حکومتی امیدوار کو واضح برتری حاصل

پیر 8 ستمبر 2025 18:35

لاہور (اُردو پوائنٹ اخبارتازہ ترین - این این آئی۔ 08 ستمبر2025ء) پنجاب اسمبلی میں سینیٹ کی نشست پر ضمنی الیکشن کل ( منگل ) کو ہو گا، سینیٹ کی نشست پی ٹی آئی رہنما اعجاز چوہدری کی نااہلی سے خالی ہوئی تھی۔سینیٹ کی نشست کے لیے حکمران جماعت مسلم لیگ (ن) اور اتحادیوں نے رانا ثناء اللہ خان کو امیدوار بنایا ہے جبکہ اپوزیشن کی جانب سے اعجاز چوہدری کی اہلیہ سلمیٰ اعجاز امیدوار ہیں۔

پنجاب اسمبلی میں ووٹنگ کا عمل صبح 9بجے سے شام 5بجے تک جاری رہے گا، ووٹنگ کا عمل پنجاب اسمبلی کی نئی عمارت میں ہو گا، پنجاب اسمبلی میں ارکان کی مجموعی تعداد 363ہے۔

(جاری ہے)

سینیٹ الیکشن میں جیت کے لیے امیدوار کو 180ووٹ درکار ہوں گے۔ رانا ثنا اللہ کو 263ووٹوں کی حمایت حاصل ہے جبکہ اپوزیشن سے سلمی اعجاز کو 100ووٹوں کی حمایت حاصلہے ۔ تاہم ڈپٹی اپوزیشن لیڈر معین قریشی نے کہا کہ اپوزیشن نے ضمنی انتخابات کا بائیکاٹ کر رکھا ہے، اپوزیشن ووٹ کاسٹ نہیں کرے گی۔

ہدایات جاری کر چکا ہوں کہ آج (منگل ) اپوزیشن کا کوئی رکن اگر اسمبلی گیا تو پارٹی پالیسی کی خلاف ورزی کا مرتکب ہو گا، کاغذات نامزدگی وقت ختم ہونے کے باعث واپس نہیں لے سکے۔واضح رہے کہ سینٹ کی نشست اعجاز چوہدری کو 9مئی کیسز میں سزا کے باعث خالی ہوئی تھی۔