Live Updates

چنیوٹ، حکومت اور عوامی نمائندے مل کر سیلاب متاثرین کی بحالی کے لیے ہر ممکن اقدامات کر رہے ہیں،وفاقی وزیر برائے سرمایہ کاری بورڈ قیصر احمد شیخ

پیر 8 ستمبر 2025 21:45

ٌچنیوٹ(اُردو پوائنٹ اخبارتازہ ترین - آن لائن۔ 08 ستمبر2025ء)وفاقی وزیر برائے سرمایہ کاری بورڈ قیصر احمد شیخ نے کہا ہے کہ حکومت اور عوامی نمائندے مل کر سیلاب متاثرین کی بحالی کے لیے ہر ممکن اقدامات کر رہے ہیں۔ مشکلات ضرور ہیں لیکن ایک مربوط منصوبہ بندی کے تحت متاثرہ علاقوں کی تعمیر و بحالی کے لیے دن رات کام جاری ہے۔وفاقی وزیر نے اڈہ پٹھان کوٹ، جامع آباد، ٹھٹی بالاراجہ، شیخن اڈا، موضع کل، موضع کلری اور لالیاں سمیت مختلف متاثرہ علاقوں کا دورہ کیا۔

اس موقع پر انہوں نے قائم کیے گئے میڈیکل ریلیف کیمپوں میں مریضوں کی تیمارداری کی اور طبی عملے کی کارکردگی کا جائزہ لیا۔ انہوں نے بتایا کہ متاثرین کے لیے فوری طور پر خوراک اور خیموں کا بندوبست کیا گیا ہے جبکہ ان کی صحت اور مکمل بحالی کے لیے جامع منصوبہ بندی پر عمل جاری ہے۔

(جاری ہے)

میڈیا سے گفتگو کرتے ہوئے قیصر احمد شیخ نے کہا کہ حکومت کی طرف سے متاثرہ علاقوں کے لیے 25 کروڑ روپے کی خصوصی گرانٹ فراہم کی گئی ہے جسے ترجیحی بنیادوں پر استعمال کیا جا رہا ہے۔

مزید فنڈز کی فراہمی بھی جلد ممکن بنائی جائے گی۔ انہوں نے کہا کہ مخیر حضرات اور مقامی تنظیمیں بھی اس کار خیر میں بڑھ چڑھ کر حصہ لے رہی ہیں۔وفاقی وزیر نے کہا کہ صوبائی و وفاقی حکومتیں اور مقامی انتظامیہ ہر سطح پر تعاون کر رہی ہیں، متاثرہ عوام کو کسی صورت تنہا نہیں چھوڑا جائے گا۔مزید برآں، انہوں نے چین کے حالیہ دورے کا ذکر کرتے ہوئے کہا کہ تاریخ کی سب سے بڑی سرمایہ کاری کانفرنس منعقد ہوئی جس میں وزیراعظم، وفاقی وزراء اور چینی سرمایہ کاروں نے پاکستان میں بڑے منصوبوں پر سرمایہ کاری کی یقین دہانی کرائی۔ انہوں نے کہا کہ مستقبل قریب میں بڑی چینی صنعتیں پاکستان منتقل ہوں گی جس سے روزگار کے مواقع پیدا ہوں گے اور ملکی برآمدات میں نمایاں اضافہ ہوگا