Live Updates

سیلابی صورتحال کے باعث گندم کی مصنوعی قلت پیدا کرنے والے کسی رعایت کے مستحق نہیں

حکومت کو عوامی مفادات کیلئے اپنی طاقت کا مظاہرہ کرنا ہوگا، ہر دکان پر سرکاری نرخنامہ نمایاں آویزاں کرنے کا حکم، پیرا کو مسلسل چیکنگ اور کارروائی کرنے کی ہدایت، وزیراعلیٰ مریم نوازکی زیرصدارت اجلاس

ثنااللہ ناگرہ منگل 9 ستمبر 2025 19:37

سیلابی صورتحال کے باعث گندم کی مصنوعی قلت پیدا کرنے والے کسی رعایت ..

لاہور ( اردوپوائنٹ اخبار تازہ ترین۔ آئی پی اے ۔ 09 ستمبر 2025ء ) وزیراعلیٰ پنجاب مریم نواز شریف کی زیرصدارت خصوصی اجلاس منعقد ہوا جس میں گندم کی ذخیرہ اندوزی کے بارے میں اہم فیصلے کیے گئے۔ اجلاس میں سیلاب کی صورتحال کی وجہ سے گندم کی غیرقانونی ذخیرہ اندوزی کرنے والوں کے ساتھ سختی سے نمٹنے کا فیصلہ کیا گیا ہے۔ پنجاب میں گندم کے سٹاک کو ڈکلیئر کرنے کیلئے تین دن کی مہلت دی جارہی ہے۔

وزیراعلیٰ مریم نواز شریف نے تین دن کے بعد گندم غیر قانونی طور پر سٹور کرنے والوں کے خلاف قانونی کارروائی کا حکم دیا ہے۔ اجلاس میں گندم کا سٹاک شو کرنے والوں کے خلاف کوئی کارروائی نہ کرنے پر اتفاق کیا گیا۔ وزیراعلیٰ مریم نواز شریف نے کہا کہ حکومت کو عوام کے مفادات کے تحفظ کے لئے اپنی طاقت کا مظاہرہ کرنا ہو گا۔

(جاری ہے)

گند م کی غیرقانونی ذخیرہ اندوزی کرنے پر قانونی کارروائی عمل میں لائی جائے گی۔

گندم سٹاک کرنے والے رضاکارانہ طور پر ڈکلیئر کر یں ورنہ کارروائی ہو گی۔وزیراعلیٰ مریم نواز شریف نے کہا کہ سیلاب کی وجہ سے صورتحال کا فائدہ اٹھانے والے کسی رعایت کے مستحق نہیں۔بعض عناصر گندم کی مصنوعی قلت پیدا کرنے کی کوشش کررہے ہیں۔تمام ممکنہ وسائل استعمال کرکے گندم کے غیرقانونی سٹاک کی نشاندہی کی جائے۔وزیراعلیٰ مریم نواز شریف نے صوبہ میں گندم کی سٹاک کی درست طورپر نشاندہی کرکے رپورٹ پیش کرنے کی ہدایت کی۔

وزیراعلیٰ نے گندم اور آٹے کے نرخ برقرار رکھنے کے لئے ضروری اقدامات کا حکم بھی دیا۔ وزیراعلیٰ مریم نواز شریف نے پیرا کو صوبہ بھر میں مسلسل چیکنگ اور کارروائی کرنے کی ہدایت کی۔ وزیراعلیٰ مریم نواز شریف نے ہر دکان پر سرکاری نرخنامہ نمایاں طور پرآویزاں کرنے کا حکم دیا اورخلاف ورزی پر کارروائی کرنے کی ہدایت کی۔ وزیر اعلیٰ مریم نواز شریف نے خانیوال میں سیلاب سے گندم ضائع ہونے پر سخت برہمی کا اظہار کیا۔ سیلاب کے دوران گندم کو بروقت محفوظ مقامات پر منتقل نہ کرنے پرڈی جی فوڈڈیپارٹمنٹ کو عہدے سے ہٹا دیاگیا۔ سیلاب سے گندم کے ضیاع پرخانیوال کے ڈی ایف سی سمیت تمام عملہ معطل کر دیا گیا۔