Live Updates

پی ڈی ایم اے کی دریائے راوی، ستلج اور چناب میں سیلاب کے باعث ہونے والے نقصانات کی رپورٹ جاری

بدھ 10 ستمبر 2025 18:48

لاہور (اُردو پوائنٹ اخبارتازہ ترین - اے پی پی۔ 10 ستمبر2025ء) پی ڈی ایم اے نے دریائے راوی،ستلج اور چناب میں سیلاب کے باعث ہونے والے نقصانات کی رپورٹ جاری کر دی۔دریائے راوی ستلج اور چناب میں شدید سیلابی صورتحال کے باعث44 سو سے زائد موضع جات متاثر ہوئے۔ریلیف کمشنر پنجاب نبیل جاوید نے تفصیل بتا تے ہو ئے کہا ہے کہ دریائے چناب میں سیلاب کے باعث مجموعی طور پر2190 موضع جات،دریائے ستلج میں 651 موضع جات اور دریائے راوی میں1495 موضع جات متاثر ہوئے۔

دریائوں میں سیلابی صورتحال کے باعث مجموعی طور پر42 لاکھ9 ہزار لوگ متاثر ہوئے۔ریلیف کمشنر نبیل جاوید نے کہا کہ سیلاب میں پھنس جانے والے21 لاکھ 90 ہزار لوگوں کو محفوظ مقامات پر منتقل کیا گیا۔شدید سیلاب سے متاثرہ اضلاع میں404 ریلیف کیمپس جبکہ488 میڈیکل کیمپس بھی قائم کیے گئے ہیں۔

(جاری ہے)

مویشیوں کو علاج معالجے کی سہولت فراہم کرنے کیلئے421 ویٹرنری کیمپس قائم کئے گئے ہیں جبکہ متاثرہ اضلاع میں ریسکیو وہ ریلیف سرگرمیوں میں15 لاکھ81 ہزار جانوروں کو محفوظ مقامات پر منتقل کیا گیا ہے۔

انہوں نے کہا کہ منگلا ڈیم90 فیصد جبکہ تربیلا ڈیم100 فیصد تک بھر چکا ہے۔دریائے ستلج پر موجود انڈین بھاکڑا ڈیم90 فیصد تک بھر چکا ہے۔پونگ ڈیم99 فیصد جبکہ تھین ڈیم97 فیصد تک بھر چکا ہے۔ریلیف کمشنر پنجاب نے کہا کہ حالیہ سیلاب میں مختلف حادثات میں76 شہری جاں بحق ہوئے۔وزیر اعلیٰ پنجاب کی ہدایات کے پیش نظر شہریوں کے نقصانات کا ازالہ کیا جائے گا۔