پولینڈ کی درخواست پر اقوام متحدہ کی سلامتی کونسل کا ہنگامی اجلاس طلب

جمعرات 11 ستمبر 2025 13:42

وارسا (اُردو پوائنٹ اخبارتازہ ترین - اے پی پی۔ 11 ستمبر2025ء) پولینڈ کی درخواست پر اقوام متحدہ کی سلامتی کونسل کا ایک ہنگامی اجلاس طلب کیا جائے گا، جس کا مقصد پولینڈ کی فضائی حدود کی مبینہ خلاف ورزی پر غور کرنا ہے۔ پولش وزارتِ خارجہ نے سوشل میڈیا پلیٹ فارم "ایکس" (سابقہ ٹوئٹر) پر جاری بیان میں اس بات کی تصدیق کی ہے۔وزارت نے دعویٰ کیا ہے کہ روس نے پولینڈ کی فضائی حدود کی خلاف ورزی کی ہے۔

اگرچہ اجلاس کی حتمی تاریخ کا اعلان نہیں کیا گیا، لیکن سفارتی ذرائع کے مطابق یہ اجلاس ممکنہ طور پر جمعہ، 12 ستمبر کو منعقد ہو سکتا ہے۔پولش فوجی حکام کے مطابق، 10 ستمبر کی صبح کے وقت ملک کی فضائی حدود کی 19 بار خلاف ورزی کی گئی، جن میں مبینہ طور پر ڈرون شامل تھے۔ پولینڈ نے ان ڈرونز کو نشانہ بنا کر تباہ کر دیا ہے، جن میں سے اب تک تین کے ملبے کی تصدیق ہو چکی ہے۔

(جاری ہے)

پولش وزیر اعظم، ڈونالڈ ٹسک کے مطابق تمام ڈرونز بیلاروس کی جانب سے داخل ہوئے۔پولینڈ نے اس واقعے کے بعد نیٹو سے معاہدہ شمالی اوقیانوس (نیٹو) کے آرٹیکل 4 کے تحت مشاورت طلب کر لی ہے، جس کے تحت رکن ممالک کو درپیش ممکنہ خطرات پر اجتماعی مشاورت کی جاتی ہے۔ادھر روسی وزارت دفاع کا کہنا ہے کہ ان کی افواج نے مغربی یوکرین میں فوجی اور صنعتی تنصیبات کو نشانہ بنایا، اور ان کا کوئی ہدف پولینڈ میں موجود نہیں تھا۔ روسی وزارت کے مطابق جن ڈرونز کی پرواز کی اطلاع دی گئی ہے، ان کی حدِ پرواز 700 کلومیٹر سے زیادہ نہیں، جو پولینڈ تک پہنچنے کے قابل نہیں۔ تاہم روس نے پولینڈ کے ساتھ اس معاملے پر بات چیت کے لیے آمادگی ظاہر کی ہے۔