اوگرا کا اگست 2025 کے لئے سوئی نادرن اور سوئی سدرن کےلئے آر ایل این جی کی قیمتوں میں معمولی اضافہ

جمعرات 11 ستمبر 2025 19:20

اسلام آباد (اُردو پوائنٹ اخبارتازہ ترین - اے پی پی۔ 11 ستمبر2025ء) آئل اینڈ گیس ریگولیٹری اتھارٹی (اوگرا) نے اگست 2025 کے لئے سوئی نادرن اور سوئی سدرن کےلئے آر ایل این جی کی قیمتوں میں معمولی اضافہ کیا ہے۔ اوگرا کی جانب سے جاری اعلامیہ کے مطابق ستمبر 2025 میں سوئی نادرن گیس پائپ لائنز لمیٹڈ (ایس این جی پی ایل) کے لئے آر ایل این جی کی ٹرانسمیشن کی قیمت 11.2365 ڈالر فی ایم ایم بی ٹی یو جبکہ ڈسٹری بیوشن 12.0127 ڈالر فی ایم ایم بی ٹی یومقرر کی ہے۔

اسی طرح سوئی سدرن گیس کمپنی لمیٹڈ کے لئے ستمبر 2025 کی ٹرانسمیشن قیمت 9.8619 ڈالر فی ایم ایم بی ٹی یو جبکہ ڈسٹری بیوشن کےلئے 11.0105 ڈالر فی ایم ایم بی ٹی یو قیمت مقرر کی ہے۔ اگست 2025 میں ایس این جی پی ایل کےلئے آر ایل این جی کی ٹرانسمیشن قیمت 10.9770 ڈالر جبکہ ڈسٹڑی بیوشن قیمت 11.7330 ڈالر فی ایم ایم بی ٹی یو تھی۔

(جاری ہے)

اسی طرح گزشتہ ماہ کے لئے سوئی سدرن گیس کمپنی لمیٹڈ کےلئے آر ایل این جی کی ٹرانسمیشن قیمت 9.6097 ڈالر جبکہ ڈسٹری بیوشن قیمت 10.7285 ڈالر فی ایم ایم بی ٹی یو تھی۔

اس طرح اگست 2025 کے مقابلہ میں ستمبر 2025 کے لئے ملک میں گیس فراہم کرنے والی پائپ لائنز کمپیوں سوئی نادرن گیس پائپ لائنز (ایس این جی پی ایل) اور سوئی سدرن گیس کمپنی (ایس ایس جی سی ایل) کے لئے آر ایل این جی کی ٹرانسمیشن قیمت میں بالترتیب 0.2595 ڈالر اور 0.2522ڈالر فی ایم ایم بی ٹی یو جبکہ ڈسٹری بیوشن قیمت میں 0.2797ڈالر اور 0.2820 ڈالر فی ایم ایم بی ٹی یو کا معمولی اضافہ کیا گیا ہے۔

اگست کے مقابلہ میں ستمبر 2025 کے لئے ایس این جی پی ایل کے لئے آر ایل این جی کی ٹرانسمینش قیمت میں 2.36 فیصد جبکہ ڈسٹری بیوشن نرخوں میں 2.38 فیصد جبکہ ایس ایس جی سی ایل کےلئے ٹرانسمیشن اور ڈسٹری بیوشن قیمت میں 2.62 اور 2.63 فیصد کا معمولی اضافہ کیا گیا ہے۔واضح رہے کہ آر ایل این جی کی قیمت میں رد وبدل کا نوٹیفکیشن اوگرا کی ویب سائٹ www.ogra.org.pk پر بھی دستیاب ہے ۔اوگرا نے کہا ہے کہ آر ایل این جی کی قیمت میں معمولی اضافہ کا سبب ڈی ای ایس قیمت میں ہونے والا اضافہ ہے۔