میکسیکو کا چینی گاڑیوں پر ٹیرف 50 فیصد تک بڑھانے کا فیصلہ

میکسیکو سٹی (اُردو پوائنٹ اخبارتازہ ترین - اے پی پی۔ 12 ستمبر2025ء) میکسیکو نے اعلان کیا ہے کہ وہ چین اور دیگر ایشیائی ممالک سے درآمد کی جانے والی گاڑیوں پر ٹیرف 50 فیصد تک بڑھا دے گا۔ رائٹرز کے مطابق یہ فیصلہ درآمدی محصولات میں بڑی تبدیلی کے حصے کے طور پر کیا گیا ہے جسے حکومت نے روزگار کے تحفظ کے لیے ضروری قرار دیا ہے جبکہ ماہرین کا کہنا ہے کہ اس کا مقصد امریکہ کو خوش کرنا بھی ہے۔

وزارت معیشت کے مطابق نئی پالیسی کے تحت ٹیکسٹائل، اسٹیل اور آٹو سیکٹر سمیت مختلف شعبوں پر مختلف سطحوں پر ٹیرف بڑھایا جائے گا جس سے 52 ارب ڈالر مالیت کی درآمدات متاثر ہوں گی، فی الحال چینی گاڑیوں پر 20 فیصد ٹیرف عائد ہے جسے اب بڑھا کر ورلڈ ٹریڈ آرگنائزیشن کی جانب سے مقررہ زیادہ سے زیادہ سطح تک لے جایا جائے گا۔

(جاری ہے)

وزیر معیشت مارسیلو ایبرارڈ نے کہا کہ اگر کسی حد تک تحفظ نہ ہو تو مقابلہ تقریباً ناممکن ہے۔

انہوں نے وضاحت کی کہ یہ اقدامات میکسیکو میں ملازمتوں کو بچانے کے لیے ہیں۔چین کی وزارت خارجہ نے اس فیصلے پر ردعمل دیتے ہوئے کہا کہ وہ مختلف بہانوں کے تحت عائد کی گئی پابندیوں کی مخالفت کرتا ہے اور توقع کرتا ہے کہ میکسیکو اس کے بجائے عالمی معاشی بحالی اور تجارتی ترقی کے لیے تعاون کرے گا۔ ترجمان لن جیان نے کہا کہ ہم اپنی صورتحال کے مطابق اپنے حقوق اور مفادات کا پختہ دفاع کریں گے۔

رپورٹ کے مطابق یہ منصوبہ کانگریس کی منظوری سے مشروط ہے جہاں حکومت کو واضح اکثریت حاصل ہے۔وزارت معیشت کے مطابق ان اقدامات سے ایسے ممالک متاثر ہوں گے جن کے ساتھ میکسیکو کے تجارتی معاہدے موجود نہیں، یہ اقدامات کل درآمدات کے 8.6 فیصد پر اثرانداز ہوں گے اور 3 لاکھ 25 ہزار صنعتی و پیداواری ملازمتوں کو تحفظ دیں گے۔مزید برآں، اسٹیل، کھلونوں اور موٹرسائیکلز پر 35 فیصد ٹیرف جبکہ ٹیکسٹائل پر 10 سے 50 فیصد کے درمیان ڈیوٹی عائد کی جائے گی۔

یہ فیصلہ ایسے وقت سامنے آیا ہے جب امریکہ لاطینی امریکی ممالک پر زور دے رہا ہے کہ وہ چین کے ساتھ اپنے معاشی تعلقات محدود کریں۔ تجزیہ کار مارِیانا کامپیرو کے مطابق امریکہ چین کو میکسیکو کو بیک ڈور کے طور پر استعمال کرنے کی اجازت نہیں دے گا۔ انہوں نے کہا کہ پچھلی دہائی میں میکسیکو کا چین کے ساتھ تجارتی خسارہ دگنا ہو گیا ہے جو گزشتہ سال 120 ارب ڈالر تک پہنچ گیا۔