میجر عزیز بھٹی شہید کی جرات نے مکار دشمن کے ناپاک عزائم خاک میں ملا دیئے، محسن نقوی

جمعہ 12 ستمبر 2025 13:30

لاہور (اُردو پوائنٹ اخبارتازہ ترین - اے پی پی۔ 12 ستمبر2025ء) وفاقی وزیر داخلہ محسن نقوی نے کہا ہے کہ میجر عزیز بھٹی شہید کی جرات اور دلیری نے مکار دشمن کے ناپاک عزائم خاک میں ملا دیئے، شہید کی جرات اور وطن سے محبت کی داستان تاریخ میں سنہرے حروف سے لکھی جا چکی ہے۔

(جاری ہے)

جمعہ کے روزمیجر عزیز بھٹی کے یومِ شہادت کے موقع پر جاری اپنے ایک پیغام میں انہیں خراج عقیدت پیش کرتے ہوئے انہوں نے کہا کہ ان کی جرات، دلیری اور وطن سے محبت کی داستان تاریخ کے سنہرے اوراق میں ہمیشہ کیلئے لکھی جا چکی ہے، میجر عزیز بھٹی شہید کی جرات اور دلیری نے مکار دشمن کے ناپاک عزائم خاک میں ملا دیئے، انہوں نے اپنے لہو سے وفا کی وہ داستان لکھی جو تاریخ کے سینے پر نقش ہو چکی ہے۔

محسن نقوی نے کہاکہ قوم اس عظیم سپاہی کو سلام پیش کرتی ہے جو ہمیشہ کیلئے امر ہوگیا، لاہور پر دشمن کی یلغار کے سامنے سیسہ پلائی دیوار کی طرح کھڑا ہونے والا یہ بہادر افسر آج بھی قوم کے دلوں میں زندہ ہے۔وزیر داخلہ نے مزید کہا کہ میجر عزیز بھٹی شہید نے لاہور کی فضا ئوں میں بہادری کی نئی داستان رقم کی، وہ دشمن کے سامنے ایک مضبوط چٹان کی طرح ڈٹے رہے، ان کی دلیرانہ مزاحمت اور بے مثال شجاعت دشمن کیلئے صدیوں کا سبق ہے۔